«Бавария» Лаймернинг маошини ошириш талабига дуч келди
«Бавария» Конрад Лаймер билан янги шартнома бўйича ҳозирча келишувга эриша олмади. Австриялик футболчининг амалдаги битими 2027 йил ўрталаригача мўлжалланган, бироқ Мюнхен клуби уни аввалроқ янгилаб қўйишни истайди. Бу ҳақда euro-football.ru хабар беради.
Bild хабарига кўра, Лаймер томони бонуслар билан бирга йилига 15 миллион евро маош сўрамоқда. Клуб эса бундан пастроқ таклиф бермоқда. Ҳозирда 28 ёшли футболчининг йиллик даромади тахминан 8–9 миллион еврони ташкил этади.
Лаймер эса Венсан Компани жамоасидаги ҳозирги роли ва мақомига таянган ҳолда маоши оширилишини ўзига муносиб деб ҳисоблаяпти. 2023 йилдан бери «Бавария» сафида тўп сураётган ярим ҳимоячи сўнгги пайтларда ўнг қанот ҳимоячиси сифатида ҳам майдонга тушмоқда.