Лапорта: ҳакамлар «Барселона»ни сиқиб, «Реал»га енгиллик беради
«Барселона» президенти Жоан Лапорта Испания футболдаги ҳакамлик масаласи бўйича кескин фикр билдирди. Бу ҳақда euro-football.ru хабар беради.
Клуб раҳбарининг айтишича, жамоа омадсиз ўйин кўрсатган пайтларда ҳакамлар «Барселона»га нисбатан босимни кучайтиради, «Реал»да муаммо юзага келганда эса аксинча, қарорлар уларга қулай томонга ишлайди. Лапорта «Реал» футболчилари йиқилишни яхши ўрганиб олган, жарима олиш учун вазиятни маҳорат билан бўрттиради, дея киноя қилди.
Каталонияликлар сўнгги икки учрашувда мағлуб бўлди: аввал Испания Кубоги ярим финалида Мадриднинг «Атлетико»сига 0:4 ҳисобида ютқазди, кейин эса Ла Лигада «Жирона»дан 1:2 ҳисобида имкониятни бой берди. Ҳар икки ўйиндан кейин ҳакамлар қарорлари атрофида баҳс ва можаро кўтарилди.
Якшанба куни Ханс-Дитер Флик бошқарувидаги жамоа «Леванте»га қарши майдонга тушади.