«Сассуоло» «Верона»ни йирик ҳисобда мағлуб этди

Италия А Сериясининг 26-турида «Сассуоло» ўз майдонида турнир жадвалининг қуйи поғоналарида қолиб кетган «Верона»ни қабул қилди ва уч очкони ишончли тарзда қўлга киритди. Бу ҳақда euro-football.ru хабар беради.

Учрашувдаги илк жиддий вазиятлар биринчи бўлим охирларида юзага келди. Лука Липани узоқ масофадан зарба йўллаб, тўпни дарвоза тўсинига яқин ўтказиб юборди. 40-дақиқада эса Арман Лориенте узатмасидан кейин Андреа Пинамонти ҳисобни очди — 1:0. Орадан кўп ўтмай, Доменико Берардига нисбатан қоида бузилди ва ҳакам пенальти белгилади. Берарди 11 метрлик зарбани дарвозабон қайтарганига қарамай, қайтган тўпни якунлаб, фарқни иккитага оширди — 2:0.

Танаффусдан кейин ҳам мезбонлар устунликни қўлдан бермади. Улиссес Гарсия хавфли узатма амалга оширди, Кристиан Торстведтнинг боши билан йўллаган зарбаси эса дарвоза устунига яқин ўтиб кетди. 62-дақиқада «Сассуоло» қарши ҳужумни аъло даражада якунлади: Лориенте яна ассист муаллифи бўлди, Берарди эса ўз дублини расмийлаштириб, ҳисобни йирик кўринишга келтирди — 3:0.

Ўйин сўнгида кураш кескинлашди: Алиу Фадеренинг жароҳатланиши билан якунланган эпизоддан кейин Али ал-Мусратига қизил карточка кўрсатилди. Натижада «Сассуоло» «Верона»ни 3:0 ҳисобида тор-мор этди.