Дешам Аргентина ЖЧ-2022 да ёрдам кўрганига ишонмайди
Франция терма жамоаси бош мураббийи Дидье Дешам 2022 йилги жаҳон чемпионати якунлари ва Аргентина ғалабаси атрофидаги баҳсларга яна бир бор тўхталди. Бу ҳақда euro-football.ru хабар беради.
Ўша мундиал финалида айнан Аргентина французларни мағлуб этганди: 120 дақиқа давомида ҳисоб 3:3 бўлиб қолган, пенальтилар сериясида эса “альбиселесте” аниқроқ ҳаракат қилган.
Дешамнинг таъкидлашича, Аргентина рақиблари дарвозасига турнир давомида берилган ягона чинакам баҳсли пенальти Польшага қарши ўйинда белгиланган ва у ҳам голга айлантирилмаган. Унинг ҳисоб-китобига кўра, Аргентина ЖЧ-2022 даги 15 голининг атиги тўрттасини пенальтидан ургани айтилади. Шунингдек, у биринчи учрашувда ҳакам аргентиналикларнинг уч голини бекор қилганини, Нидерландияга қарши ўйинда эса қўшиб берилган вақт меъёридан ортиқ бўлгани ва баҳсли фол қайд этилганини эслатди.
“Финалда аргентиналикларга ёрдам беришди, деган гапларни тушунмайман. Биз пенальти бўйича эътироз билдирмадик, чунки ҳаммаси адолатли эканини кўрдик. Фақат Аргентинани ҳам, Францияни ҳам биргаликдаги саъй-ҳаракатлари билан мундиаллар тарихидаги энг буюк финаллардан бирини тақдим этгани учун табриклайман”, — дейди Дешам.
Қайд этилишича, Дидье Дешам 2026 йилги жаҳон чемпионати якундан сўнг Франция терма жамоасидаги лавозимини тарк этади.