Элеккеге мәгариф министры Филиппов Россиядә ни өчен бердәм имтихан кертүләрен аңлаткан

Бердәм дәүләт имтиханы (БДИ) 2001 елда югары уку йортларына кергәндә коррупциягә каршы көрәш һәм төбәкләрдән килгән абитуриентлар өчен югары белем алу мөмкинлеген арттыру өчен кертелгән иде. Бу хакта Россиянең элеккеге мәгариф министры Владимир Филиппов сөйләде, дип хәбәр итә РИА Новости.

Филиппов сүзләренчә, 1990 елларда күп кенә абруйлы университетлар чит шәһәрләрдән килүчеләр өчен ябык булган вазгыять барлыкка килгән. Гаиләләрнең конкрет югары уку йортына, бигрәк тә эре шәһәрләргә имтиханнарга бару өчен акчалары булмаган.

Нәтиҗә буларак, Мәскәү, Санкт-Петербург, Казан, Новосибирск һәм Томскның әйдәп баручы уку йортларына нигездә шул ук шәһәрләрнең мәктәпләрен тәмамлаучылар укырга кергән.

БДИ гамәлгә кертелүнең икенче сәбәбе коррупцияле массакүләм репетиторлык була. Һәр югары уку йорты каршында 90 нчы елларда түләүле әзерлек курслары ачыла, аларны абитуриентларга һичшиксез узарга кирәк була. Аларда шул югары уку йортларына керү имтиханнарында катнашучы педагоглар укыта.

Өченче сәбәп, Филиппов сүзләренчә, мәктәп программасы белән уку йортына керү сынауларындагы таләпләр арасындагы аерманы бетерү була.