20 ёшли аёл молхонадан осилган ҳолатда топилди
Қирғизистоннинг Ноокат тумани, Кўк-Бел қишлоғида яшовчи 20 ёшли аёлнинг жасади чорва молхонасидан осилган ҳолда топилган.
Маълум қилинишича, воқеа ҳақида 2026 йил 20 февраль куни 112 хизмати орқали Ноокат тумани ички ишлар бўлимига хабар тушган. Шундан сўнг ҳолат бўйича суриштирув ишлари бошланган ва суд-тиббий экспертизаси тайинланган.
Марҳуманинг яқинлари эса расмий тарзда илгари сурилаётган ўз жонига қасд қилиш тахминига ишонмаётганини билдирган. Уларнинг сўзларига кўра, қиз бир йил аввал турмушга чиққан ва турмуш ўртоғи томонидан мунтазам калтакланаётгани ҳақида шикоят қилиб келган. Қариндошлари унинг танасида, жумладан орқа ва буйрак қисмида гематомалар бўлганини айтишган.
Шунингдек, яқинлари таъкидлашича, фожиадан сал олдин қиз ҳомиладор эканини маълум қилган. Ижтимоий тармоқларда тарқалган хабарларда эса у вафотидан олдин онасига эри томонидан доимий калтакланаётганини ёзгани ва уни олиб кетишини сўрагани айтилмоқда. Она хабарни олганидан тахминан уч соат ўтиб қизининг уйига борганда, у ерда одамлар тўпланганини кўргани ва кейин қизининг вафоти ҳақида эшитгани келтирилади.
Айни пайтда мазкур ҳолат юзасидан тергов ҳаракатлари давом этмоқда.