Марказий банк картадан картага ўтказмалар бўйича тушунтириш берди

Ўзбекистон Республикаси Марказий банки жисмоний шахслар ўртасидаги (P2P) пул ўтказмаларида “ўтказма мақсади” рўйхатини қўшиш масаласи юзасидан расмий тушунтириш берди. Регуляторнинг қайд этишича, тижорат банклари ва тўлов сервислари учун ушбу функцияни жорий этиш мажбурий эмас, балки ихтиёрий ҳисобланади.

Марказий банк мазкур янгиликдан кўзланган асосий мақсадларни очиқлади. Унга кўра, бундай имкониятнинг мавжудлиги онлайн платформалар ўртасида соғлом рақобатни ривожлантириш, банк ва финтех тизимларига янги турдаги хизматларни таклиф қилиш имконини бериш ҳамда фойдаланувчи тажрибасини яхшилашга хизмат қилади.

Шунингдек, фойдаланувчилар томонидан интерфейс ва қулайлик бўйича келиб тушган таклифлар асосида ушбу функция келгусида янада такомиллаштирилиши таъкидланмоқда. Хулоса ўрнида айтиш мумкинки, агар мобил иловангизда “ўтказма мақсади” бўлими пайдо бўлса, бу банкнинг шахсий ташаббуси ҳисобланади. Ҳозирда бу борада ҳеч қандай мажбурий талаб мавжуд эмас.