Россиядә энергетиклар рекламалау һәм тәмәке продукциясе сату кагыйдәләре кырысланды

Россиядә яз башыннан гражданнарның, аеруча балаларның һәм яшүсмерләрнең сәламәтлеген яклауга юнәлдерелгән яңа законнар үз көченә керде. Аерым алганда, 1 марттан энергетикларның рекламасын балигъ булмаган балаларга адреслау һәм мондый эчемлекләрдә витаминнар яки биологик актив өстәмәләр бар дип сөйләү тыела. Бу хакта Дәүләт Думасының матбугат хезмәте хәбәр итә.

Моннан тыш, тәмәке продукциясе һәм электрон сигаретлар сатыла торган сайтларны хәзер суд карарыннан башка гына блокировкалый башлыйлар. Шулай ук наркотик матдәләрне пропагандалау өчен административ һәм җинаять җаваплылыгы кырыслана.

Дәүләт Думасы Рәисе Вячеслав Володин белдергәнчә, парламент гражданнарның, бигрәк тә балаларның сәламәтлеген потенциаль куркынычлардан саклау өчен законнарны эзлекле рәвештә камилләштерә. Аның сүзләренчә, узган елда депутатлар сигез шундый закон кабул иткән, ә быел тагын ике закон кертелгән.

Володин балигъ булмаганнарга энергетик эчемлекләр сату 2025 елның 1 мартыннан тыела, дип искәртте. Ул билгеләп үткәнчә, депутатлар бу законны ата-аналарның һәм табибларның күпсанлы мөрәҗәгатьләреннән соң тәкъдим иткән.

Хәзер балаларга мондый эчемлекләр саткан өчен җаваплылык кырысланды, штраф күләме 500 мең сумга кадәр арттырылды, дип әстәде спикер.