Мол-мулк солиғидан кимлар озод этилиши очиқланди
Мол-мулк солиғидан айрим тоифадаги шахслар тўлиқ ёки қисман озод этилган.
Тўлиқ озод этилганлар қаторига Қаҳрамонлар ва “Шуҳрат” ордени соҳиблари, уруш ногиронлари ва қатнашчилари, хизмат вақтида ҳалок бўлган ҳарбийлар ҳамда ички ишлар органлари ходимларининг ота-онаси ва бевалари киради. Шунингдек, қайта тикланадиган энергия қурилмаларини ўрнатган шахсларга 3 йил муддатга имтиёз берилади. Етим болалар эса давлат томонидан берилган уй-жой учун 23 ёшгача мол-мулк солиғидан озод этилади.
Қисман имтиёз берилган тоифалар ҳам бор. Хусусан, кўп болали оилалар, яъни 10 нафар ва ундан ортиқ фарзанди борлар, пенсионерлар ҳамда I–II гуруҳ ногиронлари 60 квадрат метргача бўлган уй-жой қисми бўйича солиқдан озод қилинади.
Қайд этилишича, мазкур имтиёз фақат битта уй-жой объектига нисбатан қўлланади. Бунинг учун тегишли ҳужжатлар солиқ органларига тақдим этилиши лозим.