Наркокурерларни ушлаган инспекторга Тошкентда майор унвони берилди
Тошкент шаҳрининг Чилонзор туманида наркокурерлар фаолиятига чек қўйган профилактика инспектори капитан Лазиз Абдукаримов хизматдаги жасорати учун муддатидан олдин майор унвони билан мукофотланди. Бу ҳақда Жамоат хавфсизлиги департаменти хабар берди.
Ҳодиса “Хавфсиз ва соғлом юрт” ойлиги ҳамда ҳудудларда хавфсиз муҳитни таъминлашга қаратилган тезкор-профилактик тадбирлар доирасида содир бўлган. 13 март куни Хирмонтепа маҳалласи профилактика инспектори Лазиз Абдукаримов кўчада шубҳали ҳаракатланаётган икки нафар шахсни тўхтатган.
Гумонланувчилар ходимнинг қонуний талабига бўйсунмай қочишга уринган, бироқ профилактика инспектори улардан бирини қувиб етиб, ушлаган. Текширув давомида унинг ёнидаги сумкадан 59 та зип-пакетга қадоқланган 295 дона прегабалин кучли таъсир қилувчи дори воситалари топилган.
Тезкор суриштирувда қўлга олинган шахс ҳудуддаги бир нечта жойларга дори воситаларини яшириб, геолокатсия орқали белгилаб кетгани аниқланган. Шунингдек, гумонланувчининг шериги Шайхонтоҳур туманида қўлга олинган ва унинг ёнидан тарқатиш учун тайёрланган 35 дона кучли таъсир қилувчи капсула топилган.
Капитан Лазиз Абдукаримовнинг жасорати ва мураккаб вазиятдаги қатъий ҳаракатлари инобатга олиниб, ички ишлар вазири буйруғи билан унга муддатидан олдин майор унвони берилди.