Өзін жарақаттады ма, әлде шабуыл жасалған ба? Оралда экс-полицейлердің оқиғасы тергеліп жатыр

Оралда пышақ жарақатын алған бұрынғы полицей ауруханаға жеткізілді. Ол өзін абайсызда жарақаттағанын айтады, бірақ полиция басқа бұрынғы қызметкердің де бұл іске қатысы бар-жоғын тексеріп жатыр, деп хабарлайды Tengrinews.kz тілшісі.
БАҚ майордың ұсталғаны туралы хабарлады
Бұған дейін "Уральская неделя" басылымы Орал қалалық полиция бөлімдерінің бірінің бастығының бірінші орынбасары, майор шеніндегі азаматтың ұсталғанын хабарлады. Басылым мәліметінше, ол қол астындағы жедел уәкілге пышақпен шабуыл жасады деп күдіктелген.
Полиция барлық болжамды тексеріп жатыр
Полицияның мәліметінше, жарақат алған адам 8 қарашада ауруханаға жеткізілген. Ер адамның өзі абайсызда жарақаттанғанын алға тартқан. Дегенмен, барлық болжам, соның ішінде жарақаттауға басқа экс-полицейдің қатысы бар-жоғы да тексеріліп жатыр.

"Тергеудің объективтілігін қамтамасыз ету үшін оған өзіндік қауіпсіздік бөлінісінің қызметкерлері жұмылдырылды. Сондай-ақ қызметтік тексеріс жүргізілді. Бұл ретте жекелеген әлеуметтік желілерде тараған, бірге ішімдік ішу кезінде жанжал болды деген ақпарат шындыққа жанаспайды", – деп хабарлады БҚО полиция департаменті.

Олардың аты-жөні жарияланбады. Полиция "екі фигурант та бұған дейін ішкі істер органдарынан босатылған" деп мәлімдеді.