Желіде “Самұрық-Қазына” және ҚТЖ басшылары ұсталған сәт болуы мүмкін кадрлар тарады

Желіде "Самұрық-Қазына" АҚ басқарма төрағасы Нұрлан Жақыпов пен "Қазақстан темір жолы" ҰК" АҚ басшысы Елжас Отыншиев ұсталуына қатысты делінген сурет және видеолар тарады, деп хабарлайды Tengrinews.kz.
Суреттердің бірінде Нұрлан Жақыповқа ұқсайтын ер адам көрінеді. Ол есік алдында үй киімімен тұр. Оның алдында қара түсті киім киген бірнеше адам тұр, олар құқық қорғау органдарының қызметкерлері болуы мүмкін. Жағдай видеоға түсіріліп жатыр.
Әлеуметтік желіден алынған кадрлар
Басқа кадрларда жазба авторлары Елжас Отыншиев деп көрсеткен ер адамды көшеде алып бара жатқанын көруге болады. Оны азаматтық киімдегі бірнеше адам екі жағынан қолтықтап алып жүр.

Кадрлар қайдан тарағаны және оны түсірген адам кім екені әзірге белгісіз.
Айта кетейік, 12 қарашада Ұлттық қауіпсіздік комитеті 11 қарашада Сыбайлас жемқорлыққа қарсы қызмет "Самұрық-Қазына" басқарма төрағасы Нұрлан Жақыповты, ҚТЖ басшысы Елжас Отыншиевті және басқа да тұлғаларды ұстағанын ресми түрде растады.
ҰҚК мәліметінше, ұсталғандар сыбайлас жемқорлық қылмысын жасады деген күдікке ілінген. Қазір істің барлық мән-жайын анықтауға бағытталған тергеу жүргізіліп жатыр.
Ведомство Қылмыстық-процестік кодекстің 201-бабына сүйеніп, сотады тергеу барысы туралы өзге ақпаратты жария етпеді.
Доллар толы чемодандар мен полиция: Астанадағы ТҮК маңында не болды?
Сондай-ақ, 12 қарашада әлеуметтік желіде Астанадағы Қонаев көшесінде орналасқан тұрғын үй кешені маңында шашылып жатқан долларлардың видеосы тарады. Кадрлардан бума-бума ақшаларды көруге болады.

Жазбаларда бұл қаражат "Самұрық-Қазына" мен ҚТЖ басшылары ұсталуына қатысы болуы мүмкін деген болжамдар айтылып жатыр. Сонымен қатар, тінту кезінде ұсталғандардың бірінің жұбайы ақша салынған сөмкелер мен чемодандарды пәтер терезесінен лақтырып жібергені туралы нұсқа да тарап жатыр. Дегенмен, бұл ақпарат та, көшеден табылған купюралардың тергеуге қатысы бар-жоғыы да әзірге ресми түрде расталған жоқ.