Mehman Hüseynova həbsdə yeni cinayət işi açılıb

Həbsdə olan bloqqer Mehman Hüseynova yeni cinayət işi açılıb.

Bu barədə bu gün, dekabrın 26-da Penitensiar Xidmət məlumat yayıb.

Məlumatda iddia edilir ki, dekabrın 26-da 14 saylı cəzaçəkmə müəssisəsində plan üzrə aparılan növbəti ümumi axtarış-baxış tədbirləri zamanı Mehman Hüseynov müəssisənin rejim-nəzarət şöbəsinin böyük inspektoru, ədliyyə leytenantı Əli Abdalovun qanuni tələblərinə tabe olmayıb.

“Ona qarşı zor tətbiq etmiş, fiziki müqavimət göstərərək sonuncuya bədən xəsarəti yetirmiş, xidməti otaqda olan əşyaları dağıdaraq sındırmışdır. Hadisə zamanı xəsarət almış Əli Abdalova tibbi yardım göstərilməsi məqsədilə müəssisəyə təcili həkim briqadası çağırılmışdır”, deyə Penitensiar Xidmətin məlumatında iddia olunur.

Üstündən pul tapıldığı iddia edilir

Məlumatda vurğulanıb ki, Mehman Hüseynovun üzərində axtarış aparılan zaman saxlanması qadağan olan 461 manat məbləğində pul aşkar edilərək götürülüb.

“Bakı şəhəri Qaradağ Rayon Prokurorluğu hadisə yerini müayinə edib və aidiyyəti üzrə araşdırma aparılır. Prokurorluqdan verilmiş məlumata görə, faktla bağlı Cinayət Məcəlləsinin 315.2-ci maddəsi (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) ilə cinayət işi başlanılmışdır”, açıqlamada yazılır.

Bu maddə izrə ittiham edilən şəxsə üç ildən yeddi ilədək azadlıqdan məhrumetmə cəzası nəzərdə tutulur.

Bu açıqlamaya, hələlik, Mehman Hüseynovdan münasibət almaq mümkün olmayıb. Onun vəkilinin baş verənlərdən xəbəri yoxdur. Amma bloqqerin dostları, yaxınları rəsmi açıqlamaya şübhə ilə yanaşırlar.

“Həbsdən çıxmağına az qalmış şərlədilər ki, həbsini uzatsınlar”

Bloqqerin yaxınları vurğulayıblar ki, Azərbaycanda cəzaçəkmə müəssələrində bundan öncə də bir sıra siyası məhbus sayılan şəxsləri azadlığa çıxmalarına az qalmış şərləyib həbs müddətlərini uzadıblar.

Azərbaycan rəsmiləri isə ölkədə insanların tənqidi mövqe və siyasi baxışlarına görə, şərlənməsi ilə bağlı deyilənləri qəbul etmirlər.

Xatırlatma

Mehman Hüseynov 2017-ci il martın 3-də Suraxanı Rayon Məhkəməsinin hökmü ilə 2 il azadlıqdan məhrum edilib. O, polisə böhtan atmaqda təqsirli bilinib. Bloqqer həbsindən öncə saxlanarkən polisdə işgəncəyə məruz qaldığını açıqlamışdı.

Apellyasiya Məhkəməsi bu hökmü qüvvədə saxlasa da, Ali Məhkəmə bloqqerin kassasiya şikayətini qismən təmin edərək, işi yenidən Apellyasiya Məhkəməsinə qaytarıb. Bakı Apellyasiya Məhkəməsi isə bloqqer barəsində aşağı məhkəmənin hökmünü qüvvədə saxlayıb.

Mehman Hüseynov çəkdiyi videolarda hökumətin fəaliyyətini tənqid edib, yüksək vəzifəli şəxslərin, deputatların olduğu deyilən bəzi mülklər barədə süjetlər hazırlayaraq sosial şəbəkələrdə yayıb. O, həbsinin fəaliyyəti ilə bağlı olduğunu bildirib.

Amma hakimiyyət rəsmiləri bildirir ki, Azərbaycanda jurnalist və bloqqerlər peşə fəaliyyətləri ilə bağlı həbs edilmirlər.