Палітолаг: Крэмль метадычна даціскае Лукашэнку
У сераду Аляксандр Лукашэнка нечакана наведаў з афіцыйным візітам Абхазію.
Artykuł Палітолаг: Крэмль метадычна даціскае Лукашэнку pochodzi z serwisu БЕЛАРУСКАЕ РАДЫЁ РАЦЫЯ.
У сераду Аляксандр Лукашэнка ўпершыню наведаў з афіцыйным візітам Абхазію. Абмяркоўваем гэты нечаканы візіт, яго прычыны і наступствы з палітычным аналітыкам Аляксандрам Класкоўскім.
Аляксандр Класкоўскі: З аднаго боку, гэта нібыта “сюрпрыз”, нечаканы візіт, а з іншага боку вялікай сенсацыі я тут не бачу. Калі ўлічыць, што апошнім часам Крэмль метадычна, паступова даціскае правадыра беларускага палітычнага рэжыму. Тут сапраўды паказальна, што з Сочы Лукашэнка прыехаў ці прыплыў у Абхазію. Былі два дні перамоваў з Пуціным. Афіцыйнай інфармацыі пра гэтыя перамовы вобмаль. І раптам Лукашэнка едзе ў Абхазію. Відавочна, што гэта звязана з перамовамі. І можна сабе змадэляваць сітуацыю, што Пуцін, слухаючы звычайную гэтую рыторыку Лукашэнкі пра хаўрусніцтва, пра гатовасць ісці ў фарватары Расеі, можа і прапанаваў яму паказаць гэта на практыцы і з’ездзіць у Абхазію. Для Крамля гэта, канешне, важны сімвалічны крок. І тое, што гэта невыпадкова, падкрэсліў сёння яшчэ спікер Пуціна Дзмітрый Пяскоў. Які сказаў, што нібыта Лукашэнка і Пуцін пытанне прызнання незалежнасці Абхазіі, а таксама прыналежнасці Крыма да Расеі не абмяркоўвалі. Але з іншага боку такая шматзначная фраза прагучала з яго вуснаў, што мы, маўляў, “спадзяёмся, што беларускія таварышы своечасова для іх прымуць адпаведнае рашэнне”. Тут можна нават пры жаданні заўважыць кепска прыхаваную пагрозу. Так што, Лукашэнка, відаць, быў змушаны зрабіць гэты візіт, разумеючы, што гэта абвострыць дачыненні з Тбілісі, але тут выбіраць не выпадае. Бо ён у вельмі кепскай сітуацыі і з эканамічнага гледзішча, і з гледзішча палітычнага.
РР: Меркавана заўтра ў Крамлі адбудуцца працэдуры далучэння чатырох украінскіх абласцей да Расеі. Сустрэча з Лукашэнкам менавіта перад гэтымі важнымі падзеямі таксама нейкі знак, што Лукашэнка па-ранейшаму адзіны саюзнік для РФ?
Аляксандр Класкоўскі: Відавочна, што гэтая сустрэча звязана менавіта з так званымі рэферэндумамі на акупаваных тэрыторыях. І вось перспектыва для Лукашэнкі яшчэ больш дыскамфортная. Тут ужо гаворка не толькі аб прызнанні Абхазіі і Крыма, тут для Крамля важна, кажучы слэнгам Лукашэнкі, “нахіліць” беларускага правадыра, каб потым было ямчэй яго прымушаць і да іншых крокаў. І найперш гаворка ідзе пра імавернае прызнанне вынікаў “рэферэндумаў”, і самае галоўнае – яшчэ глыбейшае ўцягванне Беларусі ў саўдзел у агрэсіі. Відавочна, што Лукашэнка ўсяляк адкручваецца ад адпраўкі сваіх войскаў ва ўкраінскую мясарубку, але, напэўна, гэта рабіць будзе ўсё цяжэй. І імаверна, што ў межах гэтай мабілізацыі ў Расеі, тэрыторыя Беларусі зноў будзе выкарыстана для ўдараў па Украіне.
Цалкам гутарка ў далучаным гукавым файле:
Беларускае Радыё Рацыя
Artykuł Палітолаг: Крэмль метадычна даціскае Лукашэнку pochodzi z serwisu БЕЛАРУСКАЕ РАДЫЁ РАЦЫЯ.