Гарадзенскія выданні: 25 гадоў таму

Чвэрць стагоддзя таму з 1998 года на Гарадзеншчыне пачалі з’яўляцца беларускія недзяржаўныя незалежныя выданні, пра якія сёння многія ўжо забыліся, а іншыя пра іх і не чулі.

Artykuł Гарадзенскія выданні: 25 гадоў таму pochodzi z serwisu БЕЛАРУСКАЕ РАДЫЁ РАЦЫЯ.

Чвэрць стагоддзя таму з 1998 года на Гарадзеншчыне пачалі з’яўляцца беларускія недзяржаўныя незалежныя выданні, пра якія сёння многія ўжо забыліся, а іншыя пра іх і не чулі. А выданні такія былі, і яны працягвалі традыцыі дэмакратычных выданняў Заходняй Беларусі, якая на працягу 1921-1939 гадоў знаходзілася пад юрысдыкцыяй даваеннай Польшчы.  Давайце некаторыя з іх 25-гадовай даўніны прыгадаем.

У сакавіку 1998 года выйшаў бюлетэнь Гарадзенскай гарадской арганізацыі Беларускага Народнага фронту “Адраджэньне” – “Бюлетэнь: навіны, факты”. Наклад яго быў 299 асобнікаў. Выданне цалкам было прысвечана 80-годдзю Беларускай Народнай Рэспублікі. Рэдактарам быў Сяргей Мальчык.

Выйшаў з друку ў 1998 годзе інфармацыйны бюлетэнь Ваўкавыскага таварыства абароны правоў падаткаплацельшчыкаў і спажыўцоў “Весткі”. Мэта яго была адна – абарона правоў і асноўных свабод чалавека. Адказным за выпуск з’яўляўся Мікалай Кавальчук.

Пабачыў свет у 1998 годзе бюлетэнь Слонімскага моладзевага аб’яднання “Ветразь”. Ён уздымаў праблемы моладзевых арганізацый і патрыятычнага выхавання, друкаваў юрыдычныя кансультацыі. Рэдагаваў “Ветразь” Алесь Масюк. З друку пачалі выходзіць і “Воранаўскія весткі”. Яны друкавалі праблемныя артыкулы з мясцовага жыцця, вялі палеміку з уладамі. Рэдактарам была Вераніка Радунская.

У Смаргоні пачаў выдавацца штомесячны бюлетэнь “Гімназіст” асацыяцыі “Адзінства”. Наклад быў 50-100 асобнікаў. У бюлетэні друкаваліся матэрыялы вучняў, выкладчыкаў школы-гімназіі №4 горада Смаргоні. Рэдагавала выданне Ірына Ганчарова.

У Лідзе пачала выдавацца грамадска-палітычная беларускамоўная газета “Голас Ліды”. Яна мела яскрава палітычны кірунак. Рэдагавалі газету спачатку Віктар Федасевіч, потым Артур Ганько.

У Гародні распачаў выходзіць на рускай мове бюлетэнь “Гродненский рабочий” – орган Гарадзенскага інфармацыйна-прававога цэнтра Беларускага кангрэсу дэмакратычных прафсаюзаў. Рэдагаваў яго Валерый Леванеўскі. А таксама краязнаўчы бюлетэнь гарадзенскай моладзі “Зьніч” (рэдактар Юзаф Балявіч), бюлетэнь на рускай, беларускай і польскай мовах “Медыюм”, заснавальнікам якога быў Гарадзенскі моладзевы прэс-клуб (рэдактары Таццяна Дудко і Юлія Зданчук), выданне для самастойных жанчын “Саламея” (рэдактар Алена Сіневіч). Выйшла пяць нумароў. Свет у 1998 годзе пабачылі таксама выданне “Творческий миг” гарадзенскага моладзевага фотаклуба “Міг” (рэдактар Віталь Нікановіч), “Маю права” – выданне Гарадзенскага праваабарончага рэгіянальнага цэнтра абласной грамадскай арганізацыі “Ратуша” (адказнымі за выпуск былі Наталля Маліноўская і Уладзімір Кавалёў) і іншыя.

Пачаў выдавацца ў 1998 годзе незалежны бюлетэнь Беларускага Рэзынстансу “Беларускі партызан” (рэдактар Міхась Глінка), інфармацыйнае выданне Слонімскай рады БНФ “Адраджэньне” – “Змагар” (рэдактар Паўлюк Дубіна), газета ў Дзятлаве “Наша праўда” (рэдактар Васіль Алейнікаў), бюлетэнь “Нур-свет” – орган слонімскіх мусульман (рэдактар Сулейман Байрашэўскі), бюлетэнь у Наваградку “Самі аб сабе” і іншыя. Усе яны даўно не выдаюцца, але ў гісторыі гарадзенскіх недзяржаўных СМІ яны пакінулі прыкметны след. Пра гэтыя і іншыя выданні Гарадзеншчыны яшчэ напішацца добрая кніга.

Беларускае Радыё Рацыя  

Artykuł Гарадзенскія выданні: 25 гадоў таму pochodzi z serwisu БЕЛАРУСКАЕ РАДЫЁ РАЦЫЯ.