“Беларусь 3” адзначыць Міжнародны дзень роднай мовы

Тэлеканал “Беларусь 3” штодзень на роднай мове знаёміць гледачоў з матэрыяльнай і духоўнай культурнай спадчынай краіны. Традыцыйна знакавыя гістарычныя даты адгукаюцца тэматычнымі эфірамі. 21 лютага тэлеканал далучаецца і да святкавання Міжнароднага дня роднай мовы.

У сераду ў праграме “Беларусь 3” гледачоў чакаюць любімыя пазнавальныя праекты, гульнявое кіно і яскравая анімацыя. Так, для самых маленькіх у перадачах “Дабраранак” і “Калыханка” будуць паказаны мультфільмы вытворчасці кінастудыі “Беларусьфільм”.

Госцем праекта “Кадры жыцця” ў гэты дзень стане пісьменнік, сцэнарыст, рэжысёр Уладзімір Мароз. Ён распавядзе пра ўласны творчы шлях і падзеліцца сакрэтамі стварэння дакументальнага кіно.

У 15:45 у эфіры сацыякультурнага тэлеканала – мастацкі фільм “Цераз могілкі” вытворчасці кінастудыі “Беларусьфільм”, які ў 1994 годзе ўвайшоў у спіс ста лепшых фільмаў пра вайну.

У 17:10 творчая група праграмы “Жывая спадчына” зладзіць фальклорную экспедыцыю ў вёску Перароў Гомельскай вобласці, каб даведацца пра традыцыю вырабу прыпяцкага чоўна, што набыла статус нематэрыяльнай гісторыка-культурнай каштоўнасці Беларусі.

А на працягу ўсяго святочнага дня ў міжпраграмных перапынках на тэлеканале “Беларусь 3” будуць гучаць вершы класікаў У. Караткевіча, А. Куляшова, С. Грахоўскага, байкі К. Крапівы ў выкананні прадстаўнікоў беларускай культуры.