Социалан машанехь комментари йитина ГIалгIайчуьра яхархо набахте хьажийна
Къилбаседа Кавказан гонашкарчу тIеман кхело колонехь даккха цхьа шо хан кхайкхийна ГIалгIайчуьрчу яхархочунна Коттаева Хадишатна, терроризм бакъярна. ПIераскан дийнахь бовзийтина суьдхоша шайн сацам.
Талламчийн версица, 31 шо долчу Коттаевас 2018-чу шеран Зазадокху-баттахь, ша Малгобекехь йолчу заманчохь, мобилан телефона тIера "ВКонтактерчу" агIонехь комментари язйина хилла, "терроризман идеологи а, терроризм лелор а нийса хеташ" зорбане яьккхинчу публикацина бухахь аьлла"Кавказский узел" агенталле кхелан пресс-гIуллакххойн векало.
Цхьа тоьшалла а ца луьстуш, Коттаевас шена бехк тIелаьцна йоьдучу кхелан цхьана кхеташонехь. Иза бехкехилар тIе а чIагIдина суьдхоша набахтехь даккха шо хан тоьхна Коттаевана.
Иштта, кху шеран Мангал-баттахь Нохчийчуьрчу чоьхьарчу гIуллакхийн министраллан декъаца юкъахь талламаш бинчул тIаьхьа, ВКонтактерчу социалан машанехь даржон дихкина аудиофайл гучуяьллера республикерчу прокуратурана. Гуьмсан кIоштарчу вахархочо шен аккаунтехь зорбане хIоттийна хилла и материал, кхечаьрга ладогIийта а, шайн агIонашка дIаэца а аьтто буьтуш, яздора меттигерчу хаамийн гIирсо.
Экстремистийн артиклаш лерина, федералан тептаре ерзийна материалаш яржийна цо аьлла, административан гIуллакх айдира цунна дуьхьал республикан прокуратурано.
ГIуда такхар тIе а дожийна, таIзар дира Гуьмсерчу вахархочунна.