«Փյունիկը» 10 ֆուտբոլիստով կամային հաղթանակ տարավ «Արարատ-Արմենիայի» նկատմամբ (տեսանյութ)

Հայաստանի Բարձրագույն խմբի առաջնության 3-րդ տուրն ավարտվեց դիտարժան խաղով:

«Փյունիկը» Վազգեն Սարգսյանի անվան «Հանրապետական» ստադիոնում հյուրընկալել էր «Արարատ-Արմենիային» և հաղթեց 3:1 հաշվով:

Հաշիվը բացել են «Արարատ-Արմենիայի» ֆուտբոլիստները: Հանդիպման 36-րդ րոպեին «Փյունիկի» հարձակվող Ռոբերտ Մինասյանը ձեռքով հեռացրել է գնդակը դարպասային գծի մոտից` փրկելով իր թիմին վերահաս գոլից: Մինասյանը կարմիր քարտով հեռացվել է դաշտից, իսկ նշանակված 11 մետրանոցը հստակ է իրացրել Պաշովը:

Առաջին խաղակեսի վերջին րոպեին Հովհաննես Իլանգյոզյանը գոլ է խփել` հավասարեցնելով հաշիվը:

Երկրորդ խաղակեսում փյունիկցիները կարողացել են 2 գոլ խփել: Նախ, 58-րդ րոպեին Վիտալի Ստեժկոն առաջ է մղել «Փյունիկին», ապա 84-րդ րոպեին Մկոյանի` գնդակը կորցնելուց հետո դիպուկ է հարվածել Կոնատեն:

«Փյունիկը» հաղթանակով է սկսում Հայաստանի ընթացիկ առաջնությունը, «Արարատ-Արմենիան» իր 3-րդ խաղում կրում է առաջին պարտությունը:

Գոլերի տեսանյութերը` ստորև.