Աջարիայում ապաքինվել են կորոնավիրուսով վարակված բոլոր հիվանդները. առողջարանները պատրաստվում են զբոսաշրջային սեզոնին
Աջարիայում կորոնավիրուսով բոլոր վարակվածները բուժվել են: Տարածաշրջանը, որը ստացել է կորոնավիրուսից ազատ կարգավիճակ, սկսում է պատրաստվել զբոսաշրջային սեզոնին: Ինչպես փոխանցում է Новости-Грузия-ն, այս մասին ճեպազրույցի ժամանակ հայտարարել է Աջարիայի ղեկավար Թոռնիկե Ռիժվաձեն:
Ապրիլի 30-ից Աջարիայում կորոնավիրուսով վարակման նոր դեպքեր չեն արձանագրվել: Ընդհանուր առմամբ, տարածաշրջանում հիվանդությունը հաստատվել է 70 մարդու մոտ: Նրանցից երկուսն էին մինչ այս պահը շարունակում բուժումը Բաթումի հիվանդանոցում, բայց այսօր հայտնի է դարձել, որ նրանք ևս ապաքինվել են և առաջիկայում դուրս կգրվեն:
Միրնույն ժամանակ Աջարիայի կառավարությունից հայտնում են, որ շրջանում ավելի քան 10.700 կորոնավիրուսի թեստ է իրականացվել:
««Կանաչ գոտու» և անվտանգ շրջանի կարգավիճակը հատկապես կարևոր է մեզ համար՝ կապված զբոսաշրջային սեզոնի հետ: Մենք բոլորս պետք է շատ ուշադիր հետևենք խորհուրդներին, որպեսզի վերադառնանք տնտեսական վերականգնման փուլին և ընդունենք զբոսաշրջիկներին»,- ասել է Ռիժվաձեն:
Վրաստանն այսօրվա դրությամբ Եվրոպայի ամենաբարենպաստ երկրներից մեկն է կորոնավիրուսի տարածման տեմպերի և դրա դեմ արդյունավետ կառավարման առումով:
Այսօրվա դրությամբ Վրաստանում բուժումը շարունակում է 208 հիվանդ, 12 մարդ մահացել է, 508-ն՝ ապաքինվել: Դա փետրվարի 26-ից ի վեր արձանագրված բոլոր դեպքերի մոտ 70 տոկոսն է:
Հիշեցնենք, որ մայիսի 23-ից երկրում վերացվել է արտակարգ դրությունը: Հունիսի 15-ից Վրաստանում կբացվի զբոսաշրջային սեզոնը, հուլիսի 1-ից երկիրը կընդունի արտասահմանցի զբոսաշրջիկների:
Ինչ վերաբերում է Աջարիայի սևծովյան առողջարաններին, տեղի իշխանությունները խոստանում են, որ զբոսաշրջային սեզոնի բացումից հետո լողափերում «թեթև վերահսկողություն» կիրականացվի սոցիալական հեռավորության պահպանման համար: