Ինչու է Ռուբեն Վարդանյանը որոշել մասնակցել ՈՄԱ-ի հավաքներին․ «Հրապարակ»
«Հրապարակ» թերթը գրում է․ «Գործարար Ռուբեն Վարդանյանը, որը քաղաքականություն մտնելու հայտ է ներկայացրել` «Ապրելու երկիր» կուսակցության միջոցով, օրերս ներկա է գտնվել ՈՄԱ-ի՝ «Ողջ մնալու արվեստը» ռազմամարզական հասարակական կազմակերպության հավաքներին։ ՈՄԱ-ի հիմնադիրը հետախույզ Վովա Վարդանովն է։ ՈՄԱ-ում ռազմամարզական հավաքներ են իրականացվում․ փոքրից մինչեւ մեծ՝ կարող են հաճախել այդ հավաքներին եւ տիրապետել զենքի օգտագործման կանոններին, սովորել ճիշտ կրակել, մարզվել, ռազմական պատրաստականություն անցնել, որ վաղը, եթե Աստված չանի, նորից պատերազմ սկսվի, կարողանան զենք վերցնել ու պաշտպանել հայրենիքը եւ իրենց։
Ռուբեն Վարդանյանը, մեր տեղեկություններով, մայիսի 1-ից սկսել է հաճախել ՈՄԱ-ի մեկշաբաթյա ռազմական հավաքներին, ինչը բավականին տարօրինակ է։ «Ապրելու երկիր» կուսակցության համահիմնադիր Մեսրոպ Առաքելյանը մեր հարցին, թե ինչու է Ռուբեն Վարդանյանը որոշել մասնակցել ՈՄԱ-ի հավաքներին, ասաց․ «Ռուբեն Վարդանյանը միշտ է կարեւորում բոլոր քաղաքացիների մարտական պատրաստվածությունը։ Մեր հայրենիքի սահմանները մենք պետք է պաշտպանենք, ուրիշ ոչ ոք, հետեւաբար, առաջին հերթին հենց իր եւ իր ընտանիքի օրինակով այս գաղափարը կարեւորելը բնական է, եւ որեւէ արտառոց բան չկա պարոն Վարդանյանի մասնակցության մեջ՝ ռազմական հավաքներին»։
Ինչ վերաբերում է Ռուբեն Վարդանյանի եւ «Ապրելու երկիր» կուսակցության միջեւ համագործակցությանը, ապա․ «Ռուբեն Վարդանյանի եւ «Ապրելու երկիր» կուսակցության միջեւ համագործակցությունն ակտիվորեն շարունակվում է։ Այդ համագործակցության հիմքում ընկած է երկրի առջեւ ծառացած բազմաթիվ մարտահրավերների դիմաց պայքարելու համախոհությունը»»:
Մանրամասները՝ թերթի այսօրվա համարում։