Գյումրիում համաքաղաքային Սուրբ Զատիկ են տոնել՝ անցած տարվանից 23 անգամ պակաս ծախս անելով
Սուրբ Զատկի կապակցությամբ Գյումրիում միջոցառում էր կազմակերպել քաղաքապետարանը: Նախորդ տարվանից փորձ է արվում տոնին համաքաղաքային բնույթ տալ: Զատկի տոնին նվիրված ազգային երգերով Աբովյան փողոցում հանդես եկան մանուկները, հետո հավկիթախաղ էր, Ավետիք Իսահակյանի տուն-թանգարանի բակում էլ դպրոցականները ներկայացրին Սուրբ Հարության տոնի ծագումնաբանությունը, անդրադարձան դրա ազգային ու ժողովրդական նշանակությանը: Միջոցառումներին ներկա էր Գյումրիի քաղաքապետ Վարդգես Սամսոնյանը: Օրը …
The post Գյումրիում համաքաղաքային Սուրբ Զատիկ են տոնել՝ անցած տարվանից 23 անգամ պակաս ծախս անելով appeared first on ԳԱԼԱ.
Սուրբ Զատկի կապակցությամբ Գյումրիում միջոցառում էր կազմակերպել քաղաքապետարանը: Նախորդ տարվանից փորձ է արվում տոնին համաքաղաքային բնույթ տալ: Զատկի տոնին նվիրված ազգային երգերով Աբովյան փողոցում հանդես եկան մանուկները, հետո հավկիթախաղ էր, Ավետիք Իսահակյանի տուն-թանգարանի բակում էլ դպրոցականները ներկայացրին Սուրբ Հարության տոնի ծագումնաբանությունը, անդրադարձան դրա ազգային ու ժողովրդական նշանակությանը: Միջոցառումներին ներկա էր Գյումրիի քաղաքապետ Վարդգես Սամսոնյանը: Օրը թեև տոնական էր, հրավիրված էր ամբողջ քաղաքի բնակչությունը, բայց քաղաքի կենտրոնում միջոցառումները մարդաշատ չէին ու սահմանված 3 ժամից էլ պակաս տևեցին:
Գյումրիի քաղաքապետարանի մշակույթի և երիտասարդության բաժնի պետ Լիլիթ Թովմասյանը ԳԱԼԱ-ին տված հարցազրույցի ժամանակ հայտնեց, որ անելու են ամեն ինչ, որ Զատիկը դառնա ավանդական միջոցառում Գյումրիում:
«Հակված ենք մտածել և նույնիսկ ունենք այն վստահությունը, որ յուրաքանչյուր ազգի ավանդական և ժողովրդական, նեղ ազգային և առավել այդ ազգին բնորոշ էթնիկ մշակույթը շատ ավելի հետաքրքիր է և՛ քաղաքի հյուրերին, և՛ երկրի այցելուներին, իսկ մենք գիտենք՝ հիմա Գյումրիում շատ մեծ թվով զբոսաշրջիկներ են ապրում: Օտարազգիների բավականին լուրջ քանակություն ունենք և նկատի ունենանք, որ սա լավագույն տարբերակներից մեկն է պրոպագանդել ազգային մշակույթը, այն մոռացության չմատնել, դրանով իրենց ինտեգրել, ինչո՞ւ չէ, նաև հետաքրքիր դարձնել մեր քաղաքի սովորութամշակութային կենցաղը նաև իրենց համար»,-ասում է Լիլիթ Թովմասյանը:
Նրա վստահեցմամբ՝ նպատակ կա մարդկանց տեղեկացնել, որ Հայաստանի այս կետում և այս քաղաքում Զատիկն ավանդաբար շատ հետաքրքիր գույներով ու տոներով է նշվում, ու ներքին զբոսաշրջային հոսքը ևս այս միջոցով հնարավոր է ուղղորդել Գյումրի: Լիլիթ Թովմասյանը վստահ է, որ Զատիկը պետք է դառնա օրացույցի այն օրերից, երբ Գյումրի գալը լինի պարտադիր:
Գյումրեցիները, նաև քաղաքի հյուրերը պասիվ էին, տոնական միջոցառմանը մասնակցություն չունեցան: Սրանում քաղաքապետարանի պատասխանատուն արտառոց ոչինչ չի տեսնում: Ասում է, որ պետք է տարիներ շարունակ հետևողականորեն աշխատել այդ ուղղությամբ, անել ամեն ինչ, որ միջոցառումը դառնա սպասված ու պահանջված:
«Ոչ մի տեղ գրված չէ, որ միջոցառման հենց առաջին օրը միանգամից պիտի ստանանք սպասված արդյունքը: Հիմա պետք է համբերատար կերպով ավանդականությունը և միջոցառման քաղաքացիությունը հաստատել: Բոլորը պիտի իմանան, որ այդ օրը Զատկի հետաքրքիր միջոցառում կա Գյումրիում, և արդեն ամրագրվեն մնացած բոլոր բաղադրիչները»,-վստահեցնում է Լիլիթ Թովմասյանն ու ավելացնում. «Կարող է շատ ծիծաղելի թվալ, բայց այս տարվա զատկական տոնախմբության բոլոր միջոցառումների համար ծախսվել է ընդամենը 100.000 դրամ»:
Ըստ Լիլիթ Թովմասյանի՝ դա հնարավոր է, երբ համատեղվում է համայնքապատկան մշակութային կազմակերպությունների ներուժը, նաև օգնության են գալիս տարիների ընթացքում ստեղծված համագործակցային կապերը այլ կազմակերպությունների հետ:
Հիշեցնենք, անցած տարի համաքաղաքային զատկական միջոցառումների համար Գյումրիի բյուջեից ծախսվել էր ավելի քան 2 մլն դրամ, ինչի համար քաղաքապետարանը քննադատության էր արժանացել: Հիմնախնդիրներով լեցուն Գյումրիում այդքան գումար հատկացնել Զատկի միջոցառմանը ոմանք անտրամաբանական էին համարել:
«Անցած տարվա ծավալները մի փոքր ավելի ուրիշ էին, և համաքաղաքային հավկիթախաղը ուրիշ բնույթ ուներ, ոչ թե սպոնտան, ինչպես այս տարի էր, այլ խաղային օրենքներով, երաժիշտները նույնպես անցած տարի ուրիշ չափում էին մեզ համար սահմանել»,- ասում է քաղաքապետարանի մշակույթի բաժնի վարիչն ու հավելում. «Պետք է փորձարկել բոլոր հնարավոր ձևերը և եղանակները, մինչև կարողանանք գտնել այն ոսկե միջինը, որով ավելի սիրուն ու ավելի գեղեցիկ կլինի ամեն ինչը: Նմանօրինակ միջոցառումների ժամանակ գումարը երբեք շատ չի լինում, միշտ կարելի է անվերջ ծախսել և ստանալ շատ ավելի ճոխ ու հետաքրքիր միջոցառումներ: Բայց պիտի նկատի ունենալ, թե ինչից ինչ է ծախսվում: Մենք կարողացանք այսպիսի սուղ միջոցներով այս տոնը տոնել»:
Ըստ Լիլիթ Թովմասյանի՝ քաղաքապետարանի մշակույթի և երիտասարդության հարցերի բաժնին իրականում Սուրբ Զատկի տոնակատարության համար ավագանու որոշմամբ, որը հաստատվել է նախորդ տարվա դեկտեմբերին, 1 մլն դրամ է հատկացվել: Իսկ ընդհանուր միջոցառումների համար այս տարի հատկացվել է 26 մլն դրամ:
«Ուղղակի որ սկսում ես կազմակերպել, հաշվի առնելով եղանակային պայմանները, տվյալ պահին եղած ներուժը, հնարավորությունները, և տեսնում ես, որ կարող ես ավելի քիչ ծախսել, գնում ես ավելի քիչ ծախսելու ճանապարհով: Մնացած գումարը կամ այլ միջոցառման վրա կծախսվի, կամ կլինի խնայողություն, տարին ցույց կտա»,- հավաստեց Լիլիթ Թովմասյանը և ԳԱԼԱ-ին հայտնեց. «Այսօրվանից սկսած մինչև մայիսի վերջ ամեն օր Գյումրիում միջոցառում կա: Դրանք այնքան շատ են, որ տնտեսած գումարները ծախսելու տեղ հաստատ կգտնենք»:
Նաստյա Ժուկովան Եկատերինբուրգից է եկել Գյումրի: ԳԱԼԱ-ի հետ զրույցում ասաց, որ սիրում է տոնել Զատիկը: Բայց չգիտեր, որ Գյումրիում օրվա կապակցությամբ միջոցառումներ են անցկացվել:
«Ես Ռուսաստանի Դաշնության հյուսիսում՝ Ուրալում եմ բնակվում: Ընտանիքս սիրով է տոնում Զատիկը, ձու ենք ներկում, տատիկս ու պապիկս պաս են պահում: Ես ավելի չեզոք եմ վերաբերվում տոնին: Թեև Գյումրիում եմ ապրում, տեսել եմ, որ Ձեր խանութներում էլ «կուլիչներ» են վաճառում, բայց չգիտեմ, թե Հայաստանում Զատիկը ինչ ավանդույթներ ունի: Կուզենայի իմանալ: 5 ամիս է այստեղ եմ, Գյումրին պատմական քաղաք է, սիրում եմ այստեղ զբոսնել: Բայց ես մեծ քաղաքում եմ մեծացել, ու այստեղ մի բան պակաս է: Դա աղմուկն է, որ քիչ է: Գնում եմ Երևան, 2 օրով հագենում եմ, գալիս այստեղ հանգստանում եմ»,- ասում է Նաստյան:
Զատկի օրը Գյումրիում հյուրընկալվել էր նաև Թավուքչյանների ընտանիքը: Ավելի քան 30 տարի Միացյալ Նահանգներում բնակվելուց հետո նրանք Հայաստան են տեղափոխվել ու արդեն 6 ամիս է հայրենիքում են ապրում:
«Զատիկն ինչպես Ամերիկայում, այնպես էլ Հայաստանում հաճույքով ենք նշում: Ամուսինս՝ Գևորգ Թավուքչյանը, լիբանանահայ է, աղջիկներս՝ Սիրունը և Մարալը, Ամերիկայում են մեծացել, բայց մենք նրանց հայեցի ենք դաստիարակել, նրանց երեխաներին՝ նույնպես: Այսօր առաջինը գնացինք եկեղեցի, աղոթեցինք, մոմեր վառեցինք մեր ծնողների, եղբայրների, ընտանիքի համար»,- պատմում է Թագուհի Թավուքչյանն ու ավելացնում. «2017 թվականին որ առաջին անգամ եկանք Հայաստան, մտածեցինք, որ սա՛ է մեր տունը: Ինչո՞ւ մնանք օտար երկրում, երբ հայրենիք ունենք: Ամուսինս 2015 թվականին էր եկել Հայաստան ու ասել էր. «Վե՛րջ, ես հոս պիտի թաղվիմ»: Ու տեղափոխվեցինք Հայաստան: Ամերիկայի կյանքին չենք կարոտում. կյանքն այստեղ է: Գործազրկություն Ամերիկայում էլ կա, բայց սա մեր հողն է, մենք այստեղ մեզ զգում ենք տանը: Հիմա Երևանում վարձով ենք ապրում, բայց ոչինչ, կտնավորվենք ու մի օր էլ գուցե ուզենանք ապրել Գյումրիում»:
Կարինե Կազարովա
The post Գյումրիում համաքաղաքային Սուրբ Զատիկ են տոնել՝ անցած տարվանից 23 անգամ պակաս ծախս անելով appeared first on ԳԱԼԱ.