ՄԱԿ առաքելությունը, Կարմիր Խաչը և Հայաստանի վարչապետը հաստատել են՝ Ադրբեջանը չի ոտնահարել հայ բնակչության իրավունքները․ Բայրամով
Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել իր գերմանացի պաշտոնակցի՝ Աննալենա Բերբոքի հետ, որի ընթացքում քննարկել է տարածաշրջանում առկա իրավիճակը, ինչպես նաև Հայաստանի և Ադրբեջանի միջև «խաղաղության գործընթացի» (չակերտները՝ Tert.am-ի) հեռանկարները, հայտնում են ադրբեջանական լրատվամիջոցները։
Զրույցի ընթացքում Բայրամովը հայտարարել է, որ Ադրբեջանը «երբեք չի ոտնահարել հայ բնակչության իրավունքները, ինչը հաստատվել է ոչ միայն տարածաշրջան այցելած ՄԱԿ-ի առաքելության, այլև Կարմիր Խաչի միջազգային կազմակերպության և անգամ Հայաստանի վարչապետ Նիկոլ Փաշինյանի կողմից» (չակերտները՝ Tert.am-ի)։
Ադրբեջանի ԱԳ նախարարն «շարունակական անհիմն զրպարտչական արշավ» (չակերտները՝ Tert.am-ի) է որակել Արցախի բնակչությանն էթնիկ զտման ենթարկելու գնահատականները՝ հավելելով, որ դրանք «Հայաստանի և որոշ երկրների քաղաքական մանիպուլյացիաների բաղկացուցիչ մասն են կազմում» (չակերտները՝ Tert.am-ի)։
Ադրբեջանցի պաշտոնյան հավելել է նաև, որ այժմ, երբ Ադրբեջանը «վերականգնել է իր ինքնիշխանությունը, իրական հնարավորություններ են ստեղծվել Հայաստանի հետ խաղաղության պայմանագիր կնքելու համար, և Հայաստանը պետք է գնահատի այդ հնարավորությունները» (չակերտները՝ Tert.am-ի)։