Ռեալի ակադեմիայի մարզիչները Երևանում կընտրեն լավագույն հայ պատանի խաղացողներին
Foundación Real Madrid-ի, International Football Camps-ի և Eurosoccer Trips-ի պայմանավորվածության համաձայն՝ այս ամառ Հայաստանում առաջին անգամ կկայանա Մադրիդի «Ռեալի» միջազգային հավաքը:
5-օրյա երևանյան հավաքից հետո լավագույնները կմեկնեն Մադրիդ
«Ես և Արթուր Մինասյանը (խմբ. — Երևանի «Արարատի» լեգենդար ավագ, նախկին գործադիր տնօրեն) 2017 թվականին Լոս Անջելեսում հիմնեցինք մեր մանկապատանեկան ակադեմիան, որը կոչվում է LA International FC: 2019 թվականին Լոս-Անջելեսում առաջին անգամ անցկացվելու էր Real Madrid Foundation Clinic (ֆուտբոլային հավաք), որի հետ համագործակցում էր Euro Soccer Trips-ը:
Իմանալով այդ մասին՝ մեր ակումբի լավագույն խաղացողներին գրանցեցի այդ հավաքին և ծանոթացա նրանց հետ: Հավաքին յուրաքանչյուր տարիքային խմբում պետք է ընդգրկվեն լավագույնները, և հուրախություն մեզ՝ մեր սաներից Գագիկ Սիմոնյանը լավագույնը ճանաչվեց իր տարիքային խմբում՝ հնարավորություն ստանալով մասնակցելու «Ռեալի» մադրիդյան մարզաբազայում կայացած մեկշաբաթյա հավաքին, ինչը մեծ հաջողություն էր մեզ համար։ Դրանից հետո սկսեցինք սերտորեն համագործակցել նրանց հետ, Euro Soccer Trips-ը շատ պրոֆեսիոնալ կազմակերպություն է և նրանք Մադրիդում ունեն իրենց պրոֆեսիոնալ ֆուտբոլային ակադեմիան, որտեղ մեր ակումբից շատ երեխաներ են ընդգրկված»,- պատմում է Գևորգ Կարապետյանը:
Կարապետյանի խոսքով՝ այդ համագործակցության շրջանակում էլ առաջարկել է հավաք անցկացնել Հայաստանում, որպեսզի հայ երեխաներին հնարավորություն ընձեռնվի հանդես գալու Մադրիդի «Ռեալի» մարզչական անձնակազմի հետ և հսկայական փորձ ձեռքբերելու:
«Ես, Արթուր Մինասյանն ու Համահայկական երիտասարդական ֆուտբոլային ասոցիացիայի (Pan Armenian Youth Futbol Association-PAYFA) հիմնադիր Արամ Ղահրամանյանը ստեղծեցինք International Football Camps կազմակերպությունը, որը զբաղվելու է միջազգային հավաքների կազմակերպմամբ։ Մեկնեցինք Մադրիդ, ստորագեցինք պայմանագիրն ու կայացավ ծրագրի պաշտոնական ներկայացումը, որին ներկա էր նաև Մադրիդի «Ռեալի» և Բրազիլիայի հավաքականի լեգենդ Ռոբերտո Կառլոսը»,- պատմում է Գևորգ Կարապետյանը:
Երևանյան հավաքն անցկացվելու է Ավանի ակադեմիայում, մասնակցելու են 8-17 տարեկան երեխաներ: Գրանցումների և այլ մանրամասների վերաբերյալ կտրվի լրացուցիչ տեղեկատվություն:
«Այս մեծ իրադարձությունը չէր կարող կազմակերպվել առանց Հայաստանի ֆուտբոլի ֆեդերացիայի: Ուզում եմ շնորհակալություն հայտնել ՀՖՖ-ի ղեկավարներին, որոնք շատ դրական արձագանքեցին ու պատրաստակամություն հայտնեցին օգնելու՝ տրամադրելով Ավանի ակադեմիայի խաղադաշտերը:
Հուսով ենք՝ հավաքին կմասնակցեն ամենատաղանդավոր հայ երեխաները, և նրանցից լավագույնները կընտրվեն մարզիչների կողմից՝ հնարավորություն ստանալով 1-շաբաթյա հավաքի մասնակցել Մադրիդի «Ռեալի» մարզաբազայում»,- ասում է Գևորգ Կարապետյանը:
LA International Football Club-ը համախմբել է Լոս-Անջելեսի շուրջ 250 հայ երեխայի
Անդրադառնալով Լոս-Անջելեսում գործող Los Angeles International Football Club-ին՝ Գևորգ Կարապետյանն ընդգծում է՝ ակումբի պատանեկան թիմերն այս տարիների ընթացքում մեծ հաջողություններ են գրանցել։ Այժմ ակումբում 5-15 տարեկան շուրջ 250 երեխա է մարզվում:
«Շատ տաղանդավոր երեխաներ ունենք, որոնցից երկուսը՝ Սերգեյ Առաքելյանն ու Գևորգ Թումանյանը, այժմ հանդես են գալիս իսպանական «Բոադիլյա» ակումբում՝ դարձյալ Eurosoccer Trips-ի հետ համագործակցության շրջանակում:
Մասնակցել ենք տարբեր մրցաշարերի ու գրանցել ենք բազմաթիվ հաջողություններ: Ունենք նաև շատ ուժեղ մարզչական կազմ, որով շատ հպարտ ենք: Մեզ հետ են Հայաստանի ազգային և երիտասարդական հավաքականների նախկին խաղացողներ Տիգրան Դավթյանը, Վիուլեն Այվազյանը, Տիգրան Վարդանյանը, Ալեքս Քոսեմյանը, դարպասապահների մարզիչ Արթուր Ավագյանն ու Վարդան Հովսեփյանը:
Ունենք նաև իտալացի մարզիչ, որը «Մանչեսթեր Սիթիի» սան է եղել: Մեր ակումբի հետ նաև շատ այլ անուններ են կապված, որոնք իրենց մասնագիտական բարձր որակներով շատ են օգնում մեզ՝ լավագույնս հանդես գալու ԱՄՆ-ի տարբեր տարիքային բարձրակարգ առաջնություններում»,- ասում է Գևորգ Կարապետյանը:
Կարապետյանն ընդգծում է՝ իրենց նպատակը Հայաստանի պատանեկան հավաքականների համար որակյալ կադրեր պատրաստելն է. «Ունենք շատ տաղանդավոր տղաներ, և հուսով ենք՝ ապագայում նրանք կպաշտպանեն Հայաստանի մարզական պատիվն ու հանդես կգան Հայասատնի տարբեր տարիքային հավաքականներում»: