სოციალ-დემოკრატი მარინა მუსხელიშვილი ამბობს, რომ პარტიას სხვისი მიცემული ფული შესწირა
"მე თვითონ შევიტანე, მაგრამ ეს არის ფული, რომელიც იყო სპეციალურად არჩევნებისთვის მოზიდული. პრინციპში, ჩემი ნათესავების, ჩემი ამხანაგების, ჩემი ფული და ასე შემდეგ", - განაცხადა მუსხელიშვილმა.
"მოქალაქეთა პოლიტიკური გაერთიანებების შესახებ" კანონის მიხედვით (მუხლი 27), აკრძალულია სხვის ნაცვლად პარტიისთვის თანხის შეწირვა. ამ რეგულაციის დარღვევისთვის შეწირული თანხა სახელმწიფო ბიუჯეტში ირიცხება, სამართალდამრღვევს კი სანქცია ეკისრება.
მუსხელიშვილმა რადიო თავისუფლებასთან საუბრის დროსაც დაადასტურა, რომ მას მისი მეგობრები და ახლობლები დაეხმარნენ, როგორც პარტიის წევრს.
"მე მჭირდება ფული არჩევნებში მონაწილეობისთვის, ჩემი მეგობრები და ნათესავები მეხმარებიან. ვერ ვხედავ აქ კანონდარღვევას... ეს არ არის უცხო ხალხი, რომელიც ჩემი ხელით ფულს ათეთრებდეს", - თქვა მუსხელიშვილმა.
აუდიტის სამსახურში რადიო თავისუფლებას განუცხადეს, რომ 5 000 ლარის ზემოთ შემომწირველების შესახებ ინფორმაციას შემოსავლების სამსახურიდან იღებენ, რის შემდეგაც პირს გამოკითხვაზე იბარებენ. პრესსამსახურის განმარტებით, პირი ვალდებულია, შემოსავლის წყაროები დაასახელოს და დოკუმენტურად დაასაბუთოს.