ამბოხების შემდეგ რუსეთში დაიხურა პრიგოჟინის მედიაჯგუფი
რუსეთში დაიხურა მედია ჯგუფი, რომელსაც ევგენი პრიგოჟინი აკონტროლებდა - რაც, როგორც ჩანს, არის პასუხი პრიგოჟინის და მისი გასამხედროებული ჯგუფის, "ვაგნერის" მეომრების მიერ 24 ივნისს მოწყობილ, მოკლე შეიარაღებულ ამბოხებაზე.
პრიგოჟინის ვებსაიტის, RIA FAN-ის ხელმძღვანელმა, ევგენი ზუბარევმა 1 ივლისს, გვიან გამოაცხადა, რომ კომპანია იხურება, თუმცა ამის მიზეზი არ დაუკონკრეტებია.
RIA FAN-ი ყველაზე ცნობილი მედიასაშუალებაა პრიგოჟინის Patriot Media-ის ჯგუფში, რომელიც, როგორც წესი, გამოირჩევა მკვეთრად პატრიოტული, კრემლის მომხრე პოლიტიკით - ჯგუფი დადებითად აშუქებს პრიგოჟინის ქმედებებს და თავს ესხმის მის მეტოქეებს, მაგალითად სანკტ-პეტერბურგის გუბერნატორს, ალექსანდრ ბეგლოვს.
სანკტ-პეტერბურგში გამომავალმა, პრიგოჟინის მიერ კონტროლირებულმა გაზეთმა, Nevskiye novosti-მაც გამოაცხადა, რომ წყვეტს არსებობას.
გაზეთი Kommersant-ი 30 ივნისს იუწყებოდა, რომ რუსეთის მარეგულირებელმა ორგანომ, როსკომნადზორმა, პრიგოჟინის მედიის ვებსაიტები დაბლოკა, მიზეზის გამოცხადების გარეშე.
პრიგოჟინმა და "ვაგნერის" ასობით შეიარაღებულმა მეომარმა 24 ივლისს მოკლე ამბოხება მოაწყვეს - დაიკავეს დონის როსტოვი და მოსკოვზე მსვლელობით იმუქრებოდნენ. კრიზისი განიმუხტა, როცა პრიგოჟინი დათანხმდა შეთანხმებას, რომელმაც მას ბელარუსში წასვლის საშუალება მისცა, მის მეომრებს კი არჩევანი დაუტოვა ან მას შეერთებოდნენ ბელარუსში, ან რუსეთის არმიას.
ამბოხების შემდეგ პრიგოჟინი საჯაროდ არ გამოჩენილა, თუმცა ბელარუსის ავტორიტარი ლიდერი, ალიაქსანდრ ლუკაშენკა აცხადებს, რომ ის ბელარუსში იმყოფება.