МИГРАНТ АТА, ЖЕ БΥГΥНКΥ КΥНДΥН ЫСМАЙЫЛЫ
Өлкөбүздөгү экономикалык абал, базар экономикасы элдин турмушун калбыр менен чайкап, миң алекеттеп өткөрүп, шамалдын соккон жели менен кошо ыргалган камыштын башына окшоп кай тараптан финансы булагынын жели соксо, ошол тарапка агылып бара жаткандайбыз.
Алгач базар экономикасы, соода-сатык, алып-сатаарлыкты көздөп, баштык-баштык көтөрүп ортомчулук товарын ташып сыртка чыккан элибиз, эми минтип биротоло чет жерден иш издеп, оокат издеп, жашоо тирилигин издеп агылганы агалган.
Сыртта иш издеп, учурдун агымы менен кошо агып, камыр-жумур болуп, ысыгына күйүп, суугуна чыдап, чет жерден тапкан акчасы менен үй-бүлөсүн багып миграциянын түмөн түйшүгүн тарткан каарманыбыз Асыл.
Учурда эч жерде иштебейт, үч кызын тарбиялоо менен алек. Баарлашуу максатында эшик какканыбызда үстүнө көк кийип олтуруптур. Түштүк жергесинде жакын адамдарынын көзү өткөндө аза күтүү маанисин туюндурган бул түшүнүк, адамдын оюу күлүк ар нерсени ойлоно түштүм. Асыл өз сөзүндө бир аз мурдараак кайын энесинин дүйнөдөн өткөндүгүн айтып түшүндүрдү.
- Жолдошум экөөбүз Москвада иштеп жүрүп таанышканбыз, анан ал жактан баш коштук. Иштеп тапканыбызды тойго эмес тирилик үчүн жыйнап үйгө жумшадык. Улуу кызым Москвада төрөлдү, андан кийин экинчи кызымды кыргызстанга келип көз жардым. Кызым үч айга толгондо жолдошум үйдө ишсиз болгондуктан кайрадан Москвага иш издеп кетти. Улуусу мектепке барып, кичүү кызым эки жашка чыгып калганда финансылык муктаждыктын айынан эки кызымды бир туугандардын колуна таштап бир жылга жакын аралыкта кайрадан мен да Москвага барып иштеп кайтып келдим, а жолдошум мени менен бирге келе албады. Себеби келген менен ишсиз, анан дагы кара тизмеге кирип калыптыр, Кыргызстага кирсе кайра кете албайт, паспортуна депортация деп белги коюлуп калса россия аймагына кирүүгө таптакыр болбой калат. Биздин тирилик ошол жактан келген финансыга байланыштуу да. Ошенип кайтып келип үчүнчү кызымды төрөдүм. Эми үч бала менен иш табуу да кыйын, мамлекеттен эч жерде иштебегендигим үчүн жөлөк пул ар бир балага жети жүзгө жетпеген сом алганым гана болбосо башка киреше булагы жок. Жолдошумдун ай сайын салган тыйынын айдан- айга жеткирип, балдардын тамагына гана коротом.
Эки өлкөнүнү арасында чуркап жүрүп, иштеп тапканыбызды чогултуп, үй, машина алууга жетиштик бирок тирилик үчүн андан да көп каражат кетет. Тапканыбыз менен кичүү кызым эки жашка келип калды бирок атасынын колунда эркелеп, атасын жетелей элек, кара тизменен айынан атасы келип өз энесине да топурак сала албай калды- деп сөзүн жыйынтыктады.
Жакында Россия аймагында кара тизмеде жүргөн мекендештерге кечирим (амнистия) берилгенин укканда аябай сүйүнгөнүн айтып кубанып турду.
Бул бир гана үй бүлөнүн турмушу. Буга окшош тагдырлар канча? Дагы бири Кореяда аялы менен кызы калып, өзү кыргызстанда үй бүлөсүнө жете албай жүргөн «миграт кайтпастар» канча?
Каарманыбыздын өтүнүчү менен атын өзгөртүп берилди.
Баткен облусу,
Кадам жай шаары
Кубанычбекова Б.