Аба ырайы: тоолуу райондордо кар жаай турганы эскертилди
"Кыргызгидромет" борбору Кыргызстандын аймагында 28-30-марттарда туруксуз аба ырайы күтүлөрүн эскертип, көпчүлүк аймактарда жаан, тоолуу райондордо кар жаай турганын билдирди.
Чүй, Талас, Ош, Жалал-Абад, Баткен облустарынын кээ бир райондорунда жана Ысык-Көл облусунун чыгышында жаан-чачын катуу жаашы ыктымал.
Тоолуу райондордо жолдор тайгак жана тоңголок болот. Батыштан соккон шамалдын ылдамдыгы кээ бир райондордо секундасына 15-20 метрге жетет. Абанын температурасы бир аз төмөндөйт.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.
27-мартта түнкүсүн Кыргызстандын аймагында жаан жаабайт. Күндүз Чүй, Талас, Ош, Жалал-Абад, Баткен, Нарын облустарынын тоо этектериңде жаан жаап, тоолуу райондорунда кар жаашы мүмкүн, өрөөндө жаан болбойт. Ысык-Көл облусунда жаан-чачын жаабайт.
Абанын температурасы:
Чүй өрөөнүндө түнкүсүн 5…10, күндүз 15…20,
Талас жергесинде түнкүсүн 3…8, күндүз 15…20,
Баткен, Жалал-Абад, Ош облустарында түнкүсүн 6…11, күндүз 16…21,
Ысык-Көл дубанында түнкүсүн 0…5, күндүз 13…18,
Нарын аймагында түнкүсүн -3…+2, күндүз 12…17 градус болот.
27-мартта Бишкек шаарында жаан-чачын болбойт. Абанын табы борбор калаада түнкүсүн 8…10, күндүз 17…19 градусту түзөт. (ErN)