Коронавирустун жаңы штаммдары абалды оорлотту
Соңку бир суткада коронавирустан жети адам каза болду. Бул былтыркы сентябрь айынан берки эң чоң көрсөткүч. Кыргызстанда апрель айында эле вирустан каза тапкан адамдардын саны 69га жетти.
Премьер-министр Улукбек Марипов 23-апрелде "Фейсбук" социалдык тармагындагы баракчасы аркылуу түз эфирге чыгып, абал күндөн күнгө оорлоп жатканын эскертти. Өкмөт башчы элди жапырт эмдөөдөн өтүүгө чакырды.
"Азыркы тапта эң көйгөйлүү маселе - коронавирус пандемиясы. Ошондуктан, вируска каршы биз, өзүбүз бекем турушубуз керек. Коопсуздукту, тазалыкты сактоо өзгөчө маанилүү. Бизге бир топ вакциналар келди. "Sinopharm" вакцинасын "кызыл зонада" иштеген дарыгерлер, милиция кызматкерлери алып жатат. Баш калаадагы бир нече үй-бүлөлүк дарыгерлер борборунда каалоочулар үчүн акысыз эмдөө шарттарын түздүк. Урматтуу мекендештер, барып эмдөөдөн өтүңүздөр".
Тез жайылган вирустун жаңы түрлөрү
Вирус акыркы бир суткада 272 кишиден аныкталды. Азыркы тапта 1406 бейтап ооруканада жатат, алардын 400гө жакынынын абалы оор.
Оору жугузуп алгандардын көбү Бишкекте жана Чүй облусунда. Адистердин айтымында, вирустун жаңы штаммдары дал ушул эки аймактын жашоочуларынын табылууда.
Сокулук районунун аймактык ооруканасынын башкы дарыгери Эркинбек Осмоналиев азыркы кырдаал былтыркы июнь, июль айларындагы көрсөткүчкө чукулдап калганын айтты:
"Биздин ооруканада коронавирусту үч бөлүм дарылап жатат. Терапияда 16, неврологияда 16, жугуштуу оорулар бөлүмүндө 11 бейтапка ылайыктуу орун бар. Азыр анын баары оору жугузгандар чыгары менен толуп калууда. Орто эсеп менен COVID-19ду жуктурган 50гө чукул адамды дарылап жатабыз. Бул көрсөткүчтөр былтыркы июнь, июль айына салыштырмалуу көбүрөөк. Маселен, 2020-жылы биз жалпы 483 адамды дарылаганбыз. Быйыл биринчи кварталда эле 126 бейтап келди. Эгер абал ушул ыргакта улана берсе, былтыркы жай айларындагы көрсөткүчтөн ашып кетебиз. Анын үстүнө вирустун британ штаммы тез жайылып кеткендиктен ооругандар көп болуп жатат окшойт".
"Кара июль кайталанбайт"
Коронавирус менен ооругандар жана анда көз жумгандар көбөйүп жатканына байланыштуу Бишкекте жума намазга жана ооз ачарга чогулууга, дааватка чыгууга убактылуу чектөө киргизүү сунушталды.
Мындай сунушту Саламаттык сактоо жана социалдык өнүгүү министрлиги Мамлекеттик санитардык эпидемилогиялык көзөмөл борборуна жиберген.
Муфтият сунушту кабыл алганын, мечиттерде ооз ачаар уюштурулбай турганын, бирок кафе-ресторандардын ишин тыюуга ыйгарым укугу жоктугун билдирди.
Буга чейин Саламаттык сактоо жана социалдык өнүгүү министрлиги Кыргызстанда коронавирустун мутацияланган төрт штаммы аныкталганын кабарлаган.
Айрыкча өтө тез тарай турган Индия, Британия, Түштүк Африка жана Орусия штаммдары катталып, жайылып жаткандыктан коронавирустун үчүнчү толкуну май, июнь айларына туура келет деген божомолдор айтылган.
Бирок Республикалык оорулардын алдын алуу борборунун вирусологу Зуридин Нурматов былтыркыдай абал кайталанбайт деген пикирин билдирди.
"Коронавирус менен ооругандардын саны мындан ары да көбөйө берет. Бирок бул былтыркы июлдагыдай кандуу болбойт. 2020-жылдын июнь, июль айына караганда октябрь, ноябрь айында өлүмдүн саны жана жуктургандар азыраак болгон. Азыркы толкунда статистика күзүндөгү кырдаалдан да азыраак болот. Себеби, элдин көпчүлүгүндө антитела пайда болду. Мурда августтун аягында антителасы барлар 31,8% болсо, акыркы биздин изилдөөбүздүн алдын ала жыйынтыгы элде 60-70% антитела пайда болгонун көрсөтүүдө".
Ал арада Кыргызстанда коронавируска каршы эмдөө жүрүп жатат. 23-апрелге карата 14 861 адам Кытайдын " Sinopharm" вакцинасын алган.
22-апрелде өлкөгө Орусияда жасалган "Спутник V" вакцинасынын 20 миң дозасы келди. Саламаттык сактоо министрлиги аны менен 65 жаштан өткөн адамдарды эмдей баштады. Орус вакцинасын биринчи болуп белгилүү хирург Мамбет Мамакеев алганы кабарланды.
Республикалык иммунопрофилактикалык борбордун директору Гүлбара Ишенапысова Бишкек менен Чүйдө эпидемиологиялык кырдаал курч болгондуктан, "Спутник V" вакцинасы бул аймактын улгайган тургундарына биринчи сайыла турганын айтты:
"Негизи "Sinopharm" вакцинасы биринчи этап менен келгендиктен медициналык кызматкерлерге, "кызыл зонада" иштегендерге сайылып жатат. Ал эми "Спутник V" экинчи этап менен келди. Аны менен Чүй менен Бишкектеги өнөкөт оорусу бар, 65 жаштан жогору адамдар эмделет. Мындан кийин келген вакциналарды аймактарга жибере баштайбыз".
Өкмөт башчы Улукбек Марипов "AstraZeneca" вакцинасы май айынан тарта Кыргызстанга келип, жасала баштаын билдирди.
Ал эми коронавирустан улам психологиялык жактан жабыркагандар үчүн "Сорос Кыргызстан" фондунун көмөгү менен Бишкекте акысыз психологдор иштеп жатат.
Бишкекте COVID-19дан жабыркагандар үчүн акысыз жардам берген адистер
Психологдор:ТелефондоруЗарина Борбиева0552280286Бегайым Борбиева0773248240Назгүл Чолпонкулова0709857985, 0772454787Гүлмира Базарбаева0557272741