Казакстанда сабалган эки кыргызстандык боюнча “Кыйноо” беренеси менен иш козголду
Казакстанда Январь окуяларына байланыштуу кармалып, кийин кое берилген кыргыз жарандары Чолпонбек Сыдыков жана Викрам Рузахунов боюнча бул өлкөнүн Жазык кодексинин 146-беренесинин (“Кыйноо”) негизинде кылмыш иши козголуп, тергөө жүрүп жатат. Бул тууралуу 14-февралда Кыргызстандын Акыйкатчысынын аппарат башчысы Аскат Азарбеков Бишкекте өткөн пресс-конференцияда билдирди:
“Иш акыйкат каралат деген кепилдигин беришти. Иш биргелешип караларын айтышты”.
Эмерек орнотуучу болуп Казакстанга барып-келип иштеп жүргөн Чолпонбек Сыдыков Алматыдан Бишкекке кайтып келе жатканда 8-январда кармалган. Эки буту жана кабыргалары сынган, мээси чайкалган абалда ал январь айыныны соңунда Бишкекке жеткирилип, дароо ооруканага жаткырылган.
Белгилүү музыкант, пианист Рузахунов да ошол күндөрү кармалып, эки күндөн кийин коомчулуктун кийлигишүүсүнөн соң Бишкекке жеткирилген. Кийин ал да ооруканада операция болгон. Рузахунов казак күч кызматкерлеринин кыйноосуна кабылганын айтып чыккан жана кабыргалары сынып, бир кабыргасы өпкөсүнө кирип кеткенин, мээси чайкалганын билдирген.
Быйыл январда Казакстандын бир катар шаарларында өкмөткө каршы нааразылык акциялары өтүп, натыйжада миңдеген адамдар камакка алынган, 200дөн ашуун адам каза болгон. Курман болгондордун экөө кыргызстандык экени расмий айтылган. Кармалган он чакты кыргыз жараны көп өтпөй коё берилген.
Соңку маалымат боюнча, Январь окуяларына байланыштуу кармалган бир кыргыз жараны азыр Тараз шаарында кармалып турат. (RK)