Украина Беларустун аймагынан баллистикалык ракеталар атылганын билдирди
Украинанын куралдуу күчтөрүнүн башкы командачысы Валерий Залужный соңку кырдаал боюнча билдирүү таратып, Беларустун аймагынан украин жергесине төрт баллистикалык ракета атылганын кабарлады. Бул тууралуу ал өзүнүн “Фейсбук” баракчасында жазды.
Ал куралдуу күчтөр орус армиясы менен айыгышкан кармашты улантып жатканын, ондогон орусиялык танктар, аскердик учактар жок кылынганын маалымдады.
Мунун алдында Беларустун башында турган Александр Лукашенко алардын аскерлери Украинага жасалган чабуулга аралашпаганын билдирген. Орусиянын аскерлери 10-февралдан бери Беларустун аймагында биргелешкен машыгууларды өткөрүп жаткан.
Орус президенти Владимир Путин 24-февралда таң эрте билдирүү жасап, Донбасста атайын аскердик операция уюштуруу деген жүйө менен Украинага согуш ачты. Ал украин жоокерлерин куралдарын тапшырып, үйүнө кайтууга чакырды. Таңкы саат бештерде орус аскерлери Украинага чабуул жасап, басып кирди.
Украинанын президенти Владимир Зеленский бул аракетти өлкөгө каршы согуш деп атап, Орусиянын Украинага кол салышына байланыштуу дүйнөлүк лидерлерди Путинге каршы коалиция түзүүгө чакырды.
Украинанын борбору Киев баштаган шаарларда, Краматорск, Харьков, Донецк жана башка облустарда, чек арадагы аймактарда жардыруу, аткылоо болгону тууралуу маалыматтар тарап жатат. Украинанын Ички иштер министрлиги аскердик башкармалыктарга, аэродромдорго, аскердик кампаларга жана чек ара пункттарына ракета атылып, ок тийгенин ырастады. Кеминде элүүдөй украин жарандары өлгөнү тууралуу маалыматтар бар. (ErN)