Аскар Акаев: Жетекчилер артта калса, калк нааразылыкка чыгат (видео)
Кыргызстандын мурдагы президенти Аскар Акаев 19-июнда Алматы шаарындагы Аль-Фараби атындагы Казак улуттук университетте өткөн лекциядан соң "Азаттыктын" кабарчысынын Казакстандагы Январь окуялары тууралуу суроосуна жооп берди. Ал ондогон адамдын өмүрүн алган бул окуяларды "калктын өнүгүүнүн жаңы деңгээлине көтөрүлүү аракети" катары сыпаттады.
"Менимче, ар бир калк, ар бир улут маал-маалы менен өнүгүүнүн жаңы деңгээлине көтөрүлүүгө аракет кылат. Бул табигый процесс. Эгер лидерлер алдыны көрө билсе, бул социалдык нааразылыгы жок эле ишке ашат. Жетекчилер артта калса, калк нааразылыкка чыгат. Менин оюмча, бул референдумга жеткирген тарыхый окуяны жаратты. Референдумда Казакстандын калкы жаңы, гүлдөгөн, адилеттүү, күчтүү республиканы куруу тууралуу бийик максат койду", - деди Акаев.
Бирок Акаев "Азаттыктын" казак кызматынын кабарчысы Манас Кайыртай уулунун "Назарбаев Казакстанды башкарып турган учурда кандайдыр бир ката кетирдиби?" деген суроосуна жооп берген жок. Иш-чаранын уюштуруучулары кабарчыны суроосун толук бердиртпей, Акаевдин жанында топтолгон журналисттердин арасынан түртүп чыгарып коюшту.
Быйыл жыл башында Казакстандын Маңгыстау облусунда башталган суюлтулган газдын кымбатташына нааразылык билдирген митингдер өлкөнүн бир катар аймактарына жайылып, Алматыда тополоң менен коштолгон. Ал күндөрү казак президенти Касым-Жомарт Токаев шаарда миңдеген "террорчулар" бар экенин айтып, эскертүүсүз ок атуу буйругун берген. Январь окуяларында расмий маалымат боюнча 230дан ашуун адамдын өмүрү кыйылган. Бул окуядан кийин Казакстанда биринчи президент Нурсултан Назарбаевдин жана анын үй-бүлөсүнүн мурдагы таасири азайган.
2005-жылы Кыргызстандагы Март окуяларынан кийин бийликтен кетип, учурда Орусияда жашап, Ломоносов атындагы Москва мамлекеттик университетинде иштеп келаткан Акаев Алматыда «Байыркы мезгилден берки демографиялык көрсөткүчтөр жана адамзаттын келечеги» деген аталыштагы лекция окуду. 77 жаштагы Аскар Акаев былтыр 16 жылдан ашык убакыттан бери биринчи жолу Кыргызстанга келип, Кумтөр алтын кенине байланыштуу кылмыш ишинин алкагында эки жолу сурак берип кеткен.