БУУ Ооганстанда аялдардын абалы оорлоп кеткенин маалымдады

Бириккен Улуттар Уюму (БУУ) талибдер бийликке келген дээрлик бир жыл ичинде Ооганстанда адам укуктары өтө оор абалга кептелгенин маалымдады. Бул тууралуу БУУнун Ооганстанга көмөктөшүү миссиясынын “Ооганстандагы адам укуктары” деп аталган жаңы баяндамасында айтылат.

20-июлда жарыяланган документте бул өлкөдө өзгөчө аялдардын абалы начарлап кеткени белгиленет. Ооганстандын көпчүлүк аймактарында 6-класстан кийинки кыздарга мектепке барууга тыюу салынган. Мартта кыздар үчүн билим берүү жайлары ачылып, бир күн окугандан кийин эле кайра жабылган.

“2021-жылдын 15-августунан бери билим берүүдө, жумушта жана коомдук турмуштун башка аспектилеринде аялдардын жана кыздардын укуктары улам-улам чектелип, кээ бир учурларда толугу менен жоюлуп жатат”, – деп айтылат баяндамада.

Уюм кыздар толук 12 жылдык базалык билимди албай калганы алардын толук кандуу тарбияланып чыгышына кедергисин тийгизери, ансыз да бул өлкөдө прогресс болбой турганы белгиленет.

Баяндамада соттук түзүмдөн сырткары 237 жаза аткаруу учуру катталган. Анын 160 учурунда Ооганстандын мурдагы өкмөтүнүн мүчөлөрү жана мурдагы аскерлер жазага тартылган.

Ооганстандын көпчүлүк аймагын каратып алгандан кийин “Талибан” кыймылы (Кыргызстанда тыюу салынган) 2021-жылдын 15-августунда Кабулду басып алган. Мурдагы бийлик борборду кармашсыз таштап чыгып кеткен. Президент Ашраф Гани өлкөдөн качып чыгып, учурда бийлик талибдердин колунда. Талибдерден качкан миңдеген адамдар өлкөдөн чыгып кетишкен. (ErN)