Посредникот на ОН за Сирија ќе учествува на конференцијата во Сочи

Посредникот на Обединетите нации во разговирите за Сирија Стафан де Мистура ќе учествува на "мировниот конгрес" кој се организира под покровителство на Русија во Сочи идната недела и покрај тоа што главната сириска опозициска група одби да присуствува. Во соопштението објавено од Обединетите нации денеска се наведува дека генералниот секретар на светската организација е убеден дека средбата во Сочи е важен придонес за оживување на внатрешниот процес на дијалог во Сирија што се одвива под покровителство на ОН во Женева.

Западните сили, некои арапски држави и Сириската комисија за преговори веруваат дека конференцијата што ќе се одржи на 29 и 30 јануари во Сочи е обид да се создаде посебен преговарачки процес кој ќе ги поткопа напорите на ОН и ќе донесе решение кое повеќе ќе му одговара на сирискиот претседател Башар ал-Асад и неговите сојузници Русија и Иран.

Портпаролот на Сириската комисија за преговори Јахиа ал-Ариди денеска рече дека сириската влада и нејзиниот сојузник Русија не ги обезбедиле потребните услови и дека разговорите во Сочи се обид за поткопување на напорите на ОН за постигнување мировен договор.