Ципрас - Денес е историски ден, Северна Македонија ќе биде земја пријател

Северна Македонија, која се роди денес, ќе биде земја пријател, напиша премиерот на Грција, Алексис Ципрас, на неговиот официјален Твитер профил, кусо по соопштувањето на резултатите и зеленото светло од грчкиот Парламент за Договорот од Преспа. Тој додаде дека денес е историски ден и денес „се пишува нова страница за Балканот“.


„Следните генерации и во двете земји им должат благодарност на пратениците кои со храброст и смелост ги поставија темелите за иднина на мир, солидарноста и хармоничен соживот меѓу двата народи. Северна Македонија којашто се роди денес ќе биде земја пријател. Сојузник и поддржувач на Грција во нејзините напори за безбедност, стабилност и заеднички развој во регионот“, напиша грчкиот премиер.


Алексис Ципрас на почетокот од твитот напиша дека Грција денес заштитува значаен дел од нејзината историја, од културното наследство и античката грчка историја.


Грчкиот парламент денеска го ратификува Договорот од Преспа, според кој Македонија си го менува името во Северна Македонија, а за возврат Грција нема да го блокира нејзиното зачленување во НАТО и почетокот на преговори со ЕУ.