Претседателот на Владата, Зоран Заев, денеска го прими во посета министерот за одбрана на Република Турција, Хулуси Акар, кој претходно се сретна со заменичката на претседателот на Владата и министерка за одбрана, Радмила Шекеринска. Како што соопштуваат од владината прес служба, Заев ја истакнал добрата соработка со Република Турција, а посебно ја издвоил соработката на планот на одбранбените и безбедносните прашања и политики во заедничкиот пристап во однос на глобалните безбедносни закани.
Министерот Акар на средбата ја нагласил долгата заедничка историја на добри односи меѓу двете земји и изразил честитки за напредокот на нашата земја во евро-атлантските процеси, потенцирајќи дека членството во овие сојузи на Република Северна Македонија е само прашање на време и истакнавајќи дека Турција и натаму останува искрен и силен партнер на земјава.
