Државна матура ќе полагаат 15.553 ученици

За полагање на државна матурата годинава се пријавени вкупно 15.553 ученици, од кои 7692 се од гимназиско образование, 7604 од средното стручно и 257 од средното уметничко образование.


„Забележливо е дека речиси имаме изедначување на бројот на кандидати од гимназиите и од средните стручни училишта, што е и тенденција – да се зголемува бројот на кандидати за испитите од средното стручно образование“, изјави за МИА Лидија Ѓошевска, директор на Државниот испитен центар


Тестовите за државна матура ќе се одвиваат од 1 до 13 јуни. За нивно спроведување се ангажирани 2388 наставници-тестатори и 200 набљудувачи од Министерството за образование и наука, Државниот испитен центар и од Бирото за развој на образованието.