Осум загинати во пожар во Дом за лица со инвалидитет во Чешка

Осум луѓе загинаа, а 30 се повредени во пожар што рано утринава изби во Дом за лица со инвалидитет во местото Вејпрти на северот на Чешка, соопшти противпожарната служба. Тројца имаат тешки повреди.


Пожарот од засега непознати причини избил во 4:50 часот. Еден од вработените веднаш повикал противпожарна и побрзал со една колешка да ги евакуира штитениците на домот.


Во домот кој згрижува мажи со телесен или ментален хендикеп имало околу 30 луѓе.


Со оглед на тоа што Вејпрти се наоѓа близу до германската граница, на чешките пожарникари на помош им дошле и нивните германски колеги.


Ова е втор најтрагичен пожар во Чешка според бројот на жртви од 1990 година.