Алексеј Навални пак на суд по обвинение за клевета

Рускиот опозиционер Алексеј Навални се појави на суд под обвинение за клевета, што тој го нарече „политички мотивирано“. Во обвинението за клевета, Навални е обвинет за омаловажување на ветеран од Втората светска војна, кој се појави во промотивно видео за поддршка на уставните измени што би му овозможиле на рускиот претседател Владимир Путин уште двапати да се кандидира за претседател.

Навални ги нарече луѓето од промотивното видео „предавници и корупционисти“ и ги обвини властите дека користеле измислици за негово „натамошно оцрнување“. Законот е на сила и доколку биде прогласен за виновен за обвиненија за клевета, Навални може да се соочи со затворска казна во траење од две години. Сепак, неговиот адвокат смета дека тој закон не може да биде применет за неговиот клиент затоа што кога ја дал изјавата, законот сè уште не бил усвоен.

Лавров: Русија е подготвена да ги прекине односите со ЕУ

Минатата недела Навални беше осуден на три години затвор за кршење на условна казна, а тој ваквото образложение го нарече „измислица“. Затворањето на критичарот на Кремљ наиде на остра критика од меѓународната јавност, како и на закани за санкции од Европската унија (ЕУ). Рускиот министер за надворешни работи, Сергеј Лавров денеска изјави дека Русија е подготвена да ги прекине односите со ЕУ доколку бидат воведени економски санкции кон земјата поради случајот со Навални.