Мицотакис – Грците имаат доверба во вакцините

Грците одат да се вакцинираат, големо мнозинство од грчкото општество има доверба во вакцините, рече премиерот на Грција Кирјакос Мицотакис за време на средбата со претседателката Катерина Сакеларопулу.

Мицотакис и Сакеларопулу коментираа дека процесот на имунизација е позитивната и охрабрувачка вест за земјата, а грчкиот премиер истакна дека од април, кога на располагање ќе имаат повеќе вакцини, побрзо ќе може да се изгради ѕидот на имунитет.

Мицотакис, зборувајќи за пандемијата, рече дека националниот здравствен систем и покрај притисокот издржува, а охрабрувачки, според него е фактот што во изминатите денови има баланс меѓу примените и отпуштените пациенти во болниците во Атика.

Во Грција се отвораат фризерските и козметичките салони и археолошките локалитети

Во однос на рестриктивните мерки и можноста за нивно олабавување објасни дека ги чекаат препораките од Комисијата на епидемиолози за потоа да донесат одлуки.

Грчката претседателка вели дека патот кон нормалноста нема да биде едноставен или лесен.

Во Грција минатата недела почна постепено олабавување на рестириктивните мерки и беа отворени фризерските и козметичките салони, како и археолошките локалитети. Земјата од 7 ноември 2020 година е во карантин.