Комисијата за заразни болести предлага забрана за прослави на затворено во Тетовско

Министерот за здравство Венко Филипче на утринска координација со членови на Комисијата за заразни болести разговараа за епидемиолошката состојба во Тетово и се договорија до Главниот кризен штаб на Владата да предложат нови мерки за овој регион, за да се спречи рапидното ширење на вирусот Ковид-19.

„Состојбата во Тетово е крајно сериозна и новиот бран е веќе пристигнат, а тоа беше за очекување бидејќи состојбата е слична секаде во регионот. Летните одмори донесоа голема фреквенција на движење и тоа беше очекувано, оттука мора да се вратат одредени мерки на сила за да се спречи поголемо ширење на вирусот“, се наведува во соопштението на Министерството за здравство.

Министерството посочува дека анализите кои беа изработени изминативе денови од страна на Институтот за јавно здравје (ИЈЗ) укажуваат дека, вирусот пред сè се шири кај невакцинираните, при што над 90 отсто од новите случаи се невакцинирани граѓани.

„Од друга страна опфатот со вакцинација е под 20 проценти во Тетово. Како кластери каде најбрзо се шири вирусот се свадби и прослави на затворено кои ги има многу во овој регион, а според информациите на локално ниво воопшто не се почитуваат мерките за превенција, пред сè носење маски на затворено“, се додава во соопштението.

Министерството наведува дека Филипче и членовите на Комисијата предлагаат забрана за одржување на сите масовни настани на затворено, свадби, прослави, што е клучно да се почитува во следниот период, а граѓаните мора да разберат дека оваа мерка е нужна, потоа исполнетоста на затворениот дел од угостителските објекти да не смее да надминува 30 отсто, а на масите да не смеат да седат повеќе од 4 лица, засилени контроли за спроведување на овие мерки, но и мерките за лична заштита и тоа пред сè носење маски на затворено и засилување на теренската вакцинација и комуникацијата на локално ниво со цел зголемување на опфатот, бидејќи е јасно дека само со вакцинација може да спречиме и ширење, и ризици од тешко заболување кај пациентите.

„Од анализата на ИЈЗ за изминатиов период само 11 пациенти досега се воопшто хоспитализирани кои биле целосно вакцинирани, само 167 воопшто се инфицирале од преку 400 илјади вакцинирани граѓани“, се наведува во соопштението.

Тетово е град каде што коронавирусот сега најбрзо се шири.