Пленковиќ - Негирањето на хрватскиот јазик во српски учебник е срамно и недозволиво

Негирањето на хрватскиот јазик во учебник на Република Србија е срамно и недозволиво, порача денеска хрватскиот премиер Андреј Пленковиќ, додавајќи дека тоа ќе му го пренесе и на српскиот претседател Александар Вучиќ, кој денеска и утре ќе биде во Словенија на самитот ЕУ-Западен Балкан.

Хрватската безбедносна служба предупредува на ризици од руското влијание и „Српски свет“

„Амбасадата, Министерството за надворешни работи и сите релевантни служби имаат јасна задача да протестираат против српските институции. Сметаме дека тоа е срамна политика“, истакна Пленковиќ пред новинарите по состанокот на партиите од парламентарното мнозинство во Бански двори.

Хрватска очекува Србија да ги „отстрани таквите аномалии во учебниците“, кои исто така покажуваат „недостаток на почит“ кон соседната земја.

Во учебникот по граматика од група автори „Од зборови на дела“ за учениците од осмо одделение е наведено дека српскиот, словенечкиот, македонскиот и бугарскиот јазик припаѓаат на групата јужнословенски јазици, а „Хрватите, Бошњаците и некои Црногорци српскиот јазик го нарекуваат хрватски, босански, бошњачки и црногорски“.