Бугарскиот министер за образование предлага целосно бесплатно студирање за македонските студенти

Студенти од Македонија ќе студираат целосно бесплатно високо образование на државните универзитети во Бугарија – ќе бидат ослободени од сите такси. Тоа е предвидено со измените предложени од бугарскиот службен министер за образование Сашо Пенов, јавија бугарските медиуми.

Досега, студентите прифатени според уредба од 1997 година (до 300 лица годишно) ги плаќаа таксите, а износот зависеше од специјалноста.

Политика или економија - што ќе донесат студиите во Свети Николе на имењакот на УКИМ

Каква ќе биде организацијата за прием на македонските студенти и докторанди ќе се утврдува секоја година со налог на министерот за образование.

Приемот на кандидатите студенти ќе го организира бугарското Министерство за образование и култура во соработка со Министерството за надворешни работи. Приемот на докторандите ќе се врши врз основа на документи.

Средствата неопходни за образование на студенти и докторанди – до 5 лица годишно – ќе ги обезбеди бугарската држава од државниот буџет преку буџетите на соодветните високи училишта.

Целта на предложените измени е да се стандардизира режимот со кој се примаат македонските студенти во Бугарија, нагласува министерот Пенов во неговиот извештај до Министерскиот совет.

Трошоците на факултетите за студенти од Македонија ќе се надоместат со средства од државниот буџет. Потребниот дополнителен износ за 300 студенти годишно е: за 2023 година – 345 илјади лева, за 2024 година – 390 илјади лева и за 2025 година – 390 илјади лева. (еден лев изнесува 31.64 македонски денари).