Мелничарите најавуваат поскапување на лебот и брашното за 10%
Поради скапата струја и растот на берзанските цени на пченицата, меничарите најавуваат дека до крајот на ноември цената на лебот, брашното и печивата ќе порасне за најмалку 10%.
Затоа бараат субвенции за струја или да бидат додадени на регулираниот пазар, вели претседателот на Групација на мелничко-пекарската индустрија во Стопанската комора, Горан Малишиќ. Тој додава дека од голема корист би биле и ноќните вишоци што ги продава ЕСМ, зашто 75 отсто од производството на пекарската индустрија се изведува ноќе.
Пензиите растат - ќе има за уште 5 кила брашно и зејтин
„Во сегашната консталација, берзанската цена на пченицата како основна суровина повторно почна да расне. Од жетвата 2022 цената на француската берза е зголемена за околу 10 отсто, а и зголемувањето во Србија е исто така 10 проценти. Тоа значително ќе ја зголеми цената на брашното и на лебот со печивата за минимум 10 проценти во наредниот период од максимум 40 до 50 дена“, истакнува Малишиќ.
Додава дека залихите на пченица кај приватните субјекти, силоси и мелници се на историски најмал минимум поради намалената домашна жетва во 2022, но и неможноста на мелниците да набават пченица од увоз поради високата цена.
Веќе испратиле неколку барања до Владата и ресорните министерства.
Недостиг на храна нема да има, ама за цените никој не гарантира
„Најважното барање е како една од општествено најважните индустрии за прехрана на населението или индустрии кои обезбедуваат домашно брашно, леб и печива, да биде субвенционирана во цената на електричната енергија или додадена во регулираниот пазар со цел, во двете опции, цената на струјата да не биде повеќе од шест денари по киловат час. Така би се смирила ситуацијата и соодветно би се намалиле цените во корист на населението“, смета Малишиќ.
Лебот и житата веќе драстично поскапеа. Според податоците од Државниот завод за статистика, поскапувањето во август изнесуваше скоро 45%, споредено со истиот месец лани.