Приватните превозници бараат Владата да и ги одземе ингеренциите на Арсовска

Кемал Муриќ од „Слобода превоз“ денеска побара од Владата да и ги одземе на градоначалничката на Скопје, Данела Арсовска ингеренциите во делот за јавниот градски превоз.

„Преку одредени скопски градоначалници, приватно блиски со Данела Арсовска, се врши притисок врз дел од нашите колеги да се пријават на огласот. Сакам да известам дека сите превозници се едногласни да не учествуваат на тој оглас. Одлуката е донесена вчера“, изјави Муриќ.

Тој ги демантираше и тврдењата на Арсовска дека град Скопје нема долг кон приватните превозници и дека тие продавале билети, кои не ги пријавувале, а парите ги ставале во своите џебови.

Муриќ рече дека в.д. директорот на Јавното сообраќајно претпријатие „Скопје“ го признал долгот, а и сметките покажуваат дека долг кон нив постои, нагласувајќи дека приватните превозници воопшто не продавале билети во своите автобуси.

Тој додаде дека е лага и тврдењето на Арсовска дека бројот на приватните превозници е 70-тина. Муриќ посочи и дека јавниот повик за приватните превозници се однесува само за две од вкупно 16-те линии што тие досега ги опслужуваа, како и дека не него можат да се пријават само преку фирма, но не и поединечно.

„На врвот на проблемот е Данела Арсовска, а веднаш до неа се секретарот на Град Скопје, Зоран Глигоров, директорот на Јавното сообраќајно претпријатие, Александар Стојковски, и човекот кој самиот се нарекува градоначалник во сенка, Драги Митковски, познат како Драги Книга, кој иако нема никаква официјална позиција, често е во ЈСП и на полутајни средби со директорот на ЈСП“, изјави Муриќ.

Тој додаде дека очекуваат на средба да ги прими премиерот Димитар Ковачевски. На прашањето дали ќе ги отстранат автобусите, тој рече дека ако има гаранции од страна на премиерот дека ќе се реши нивниот проблем, возилата веднаш ќе бидат тргнати.

Во втората половина на ноември престанаа да возат автобусите на „Слобода превоз“ со барање да им биде исплатен долгот кој им го должи Градот, преку ЈСП Скопје. Во моментов возат само автобусите на ЈСП. Договорот на приватните превозници Мак експрес и Слобода превоз е раскинат поради „неисполнување на обврските“.