„Јасен“ сѐ уште гори, се работи на локализирање на пожарот

Борбата со големиот шумски пожар во ловиштето „Јасен“ продолжува и денеска (20 август).

Во текот на ноќта, огнот се доближил до шумскиот пат кој води од влезната капија на ловиштето „Јасен“ до ресторанот на брегот на езерото Козјак, но не се проширил, информираше директорот на Дирекцијата за заштита и спасување, Стојанче Ангелов.

Тој посочи дека во синоќешната акција биле вклучени припадници на Единицата за брзо распоредување со пинцгауери, вработени во ловиштето „Јасен“, пожарникари од Скопје и Македонски Брод, како и тим на Дирекцијата за заштита и спасување.

„Утрово започна и специфична и опасна операција за правење нов противпожарен појас на стрмниот гребен кој се спушта кон езерото, со цел огнот да биде целосно запрен. И покрај густиот чад, еден полициски и еден армиски хеликоптер веќе дејствуваат од рано утро, а се очекува приклучување и на ер трактор од ДЗС штом се расчисти видливоста“, истакна Ангелов.

На терен се и специјалци од армијата и полицијата од елитните единици „волци“ и „тигри“, претежно алпинисти, кои работат во опасни услови на расчистување на појасот и за сузбивање на огнената стихија.

Во моментов во државата се активни уште неколку пожари кои се безопасни, бидејќи горат трева и грмушки, соопштија од ДЗР.

Поради честите пожари летово, на територијата на цела држава е прогласена кризна состојба, која Владата на седница на 7 август ја продолжи за нови 30 дена.

За да се зајакнат капацитетите во справување со пожарите, Дирекцијата за заштита и спасување преку општините потпиша договори со 352 граѓани што се пријавија на неодамнешниот повик за обука на пожарникари.