Кабул го обвинува Пакистан за смртоносни напади

Надежите за продолжување на дводневниот прекин на огнот меѓу Пакистан и авганистанските талибанци се чини дека беа разбиени од пакистанскиот воздушен напад на авганистанска територија доцна во петокот, во кој наводно загинаа 10 цивили.

„Пакистан го прекрши прекинот на огнот и бомбардираше три локации во Пактика (провинција во западен Авганистан)“, изјави за новинската агенција Франс Прес, висок талибански функционер под услов да остане анонимен.

Тој додаде дека „Авганистан ќе возврати“.

Десет цивили, меѓу кои и две деца, беа убиени, а 12 ранети во нападите, изјави за АФП службено лице од провинциска болница, исто така под услов да остане анонимно. Меѓу загинатите се најмалку тројца локални крикетџии и пет други мажи, рекоа локалните жители.

Вооружен член на талибанците на затворен граничен премин меѓу Авганистан и Пакистан, 12 октомври 2025 година.
Пакистан „изврши прецизни воздушни напади“ во авганистанските гранични области, изјави за АФП висок безбедносен функционер. Службеникот рече дека „прецизниот удар“ ја таргетирал локалната талибанска група, Гул Бахадур, за која Исламабад вели дека го засолнува Кабул.

Репортер на РСЕ/РЛ во пакистанската покраина Јужен Вазиристан, преку границата со Пактика, исто така објави дека пакистански беспилотни летала го бомбардирале селото Хандар во авганистанската област Аргун.

Веста за нападите дојде во време кога двете страни се обидуваат да го продолжат кревкиот договор. Двете земји постигнаа почетен 48-часовен прекин на огнот во среда, неколку часа откако Пакистан изврши воздушни напади во Авганистан, додека страните разменија артилериски оган по границата.

Како што прекинот на огнот се приближуваше кон крајот во петок, страните изјавија дека се согласиле на договор во исчекување на завршувањето на планираните разговори во Катар. Се очекува делегации од двете земји да пристигнат во заливската држава во текот на викендот.

Неодамнешниот бран насилство следеше по нападите со беспилотни летала на Пакистан во Кабул на 9 октомври, насочени кон членови на екстремистичката група Техрик-е Талибан Пакистан (ТТП).

Нападите со беспилотни летала предизвикаа жестоки борби меѓу талибанските борци и пакистанските безбедносни сили на 11 и 12 октомври, при што загинаа десетици луѓе и се затворија клучни гранични премини по нападите. Тоа беше најсмртоносниот судир меѓу двете страни.

Пакистан изврши воздушни напади во јужната авганистанска покраина Кандахар во среда, предизвикувајќи повеќе жртви.

Се сомнева дека пакистанските воздушни напади го погодиле и Кабул. Во експлозиите загинаа најмалку пет лица, според италијанската невладина организација „Итна помош“, која управува со болница во градот.

Копнени борби избувнаа и по должината на границата долга 2.600 километри меѓу земјите, при што загинаа голем број луѓе од двете страни.