Framleis uvisst når nordmenn kan kome ut av Gaza

Det er førebels ikkje noko nytt om når dei norske borgarane som er i Gaza får reise ut, seier Noregs ambassadør i Egypt, Hilde Klemetsdal, til NRK.

– Eg veit ikkje kvar vi står i køen, men vi står i ei kø. Når det skjer noko, veit vi ikkje. Vi er lova at norske borgarar skal få kome ut. Vi håper det skjer så raskt som råd. det held vi fram med å jobbe hard for, og pressar på.

Det er rundt 250 nordmenn eller menneske med tilknyting til Noreg i Gaza no. Over halvparten av desse er barn.

Klemetsdal seier dei har vore i kontakt med kollegaer frå andre land som er på grensa mellom Egypt og Gaza. Dei seier grensa har vore stengt store delar av onsdagen. Det er difor usikkert om nordmenn får kome ut torsdag.

– Det veit vi ikkje. Men eg reknar med at når det har vore stengt i dag, er det dei som skulle ha kome ut i dag som står først i køen dersom grensa opnar i morgon, seier ho.