Trump: Sender Tom Homan til Minnesota

USAs president Donald Trump skriv på Truth Social at han skal sende Tom Homan til Minnesota.

I innlegget omtalar Trump Homan som «tøff, men rettferdig» og skriv «at han ikkje har vore involvert i dette området tidlegare, men kjenner og likar mange av folka der og vil rapportere direkte til meg».

Homan har tidlegare vore direktør for immigrasjonsmyndigheitene (Immigration and Customs Enforcement – ICE), og hadde ein sentral rolle i den fyrste presidentperioden til Trump, ifølge AP.

I ein artikkel på Det kvite hus sin nettside blir han omtalt som «den legendariske grense-tsaren».

Han har også hatt andre leiande roller innan føderale tryggings- og utlendingsetatar.

Minnesota har vore prega av omfattande uro etter at føderale immigrasjonsagentar skaut og drap Alex Pretti under ein demonstrasjon mot immigrasjonsmyndigheitene.

Det har utløyst protestar og sterk politisk kritikk i delstaten og nasjonalt.