کابل پولیس: تيره ورځ د روسیې د سفارت د کارکوونکي پر موټر ماین چاودلې
د کابل پولیس مني چې د سې شنبې (د لېندۍ ۱۱مه) په سهار مقناطیسي ماین د روسیې سفارت د کار کوونکي په موټر چاودلی دی.
که څه هم پولیس وایي چې د روسیې سفارت هېڅ یو کار کوونکي ته په دغه پېښه کې زیان نه دی اوښتی، خو د روسیې د بهرنیو چارو وزارت رسنیو ته ویلي چې دغه پېښه کې د سفارت کار کوونکي برسېرن ټپیان شوي دي.
د کابل د پولیسو ویاند فردوس فرامرز په دې اړه ازادي راډیو ته وویل: "د تېرې ورځې په سهار د کابل د شپږمې امنیتي حوزې اړوند علاو الدین سیمه کې په مقناطیسي ماین چاودنه کې په کابل کې د یو سفارت لنډ کروزر ډوله موټر هدف وګرځېده، په دې پېښه کې چاته زیان نه دی اوښتی او پېښه تر څېړنې لاندې ده."
له دې سره رشیه ټوډې 'Russia today' په نوم یوې ټلوېزیوني شبکې د روسیې د بهرنیو چارو وزارت د ویاندې ماریا زخارووا د څرګندونو پر بنسټ راپور ورکړی چې دغه موټر کې ناست کسان په کابل کې د روسیې سفارت افغان کار کوونکي وو.
د روسیې د بهرنیو چارو وزارت ویلي چې په افغانستان د روسي وګړو پر وړاندې د ترهګریزې حملې احتمال نه ردوي.
مسکو له کابله غوښتي چې د دغې پېښې څرنګوالی په هر اړخیزه توګه وڅېړي.
بل خوا د جمهور رئیس محمد اشرف غني لومړي مرستیال امرالله صالح هم د چهارشنبې( د لېندۍ ۱۲مه) په ورځ په خپله فېسبوک پاڼه لیکي چې د یو سفارت موټر د مقناطیسي ماین له چاودنې بچ شو.
د ښاغلي صالح د عامه اړیکو او رسنیو د دفتر مشر رضوان مراد وایي چې ماین د روسیې سفارت د کار کوونکو د موټر د حرکت پر مهال له موټره پریوتی او د سړک په مخ چاودلی دی.
دی وايي: "ماین د موټر په وروستۍ برخه نښلول شوی و چې د حرکت پر مهال ترې پریوتی او بیا چاودلی دی چې هېڅ چا ته زیان نه دی اوښتی، د دې لپاره چې د تروریستانو دغه پلانونه شنډ کړو، د شپږ نیمو بجو ټیم د ملي امنیت په کشف او ټکنالوژیکي نوښتونو هڅه کوي چې د مقناطیسي ماینونو د چاودنو مخنیوی وکړي."
که څه هم په دې وروستیو کې د مقناطیسي ماین چاودنه پېښې ډېرې شوي، خو دا لومړی ځل دی چې د یو سفارت د کار کوونکو د موټر له هدف ګرځېدو ویل کېږي.