د کندهار 'مېرمن راډيو' د ۲۰۲۰ کال نړیواله جایزه تر لاسه کړه
په کندهار کې د "مېرمن" په نوم د ښځو لپاره ځانګړې محلي راډیو د بې پولي خبریالانو سازمان له خوا د ۲۰۲۰ میلادي کال د اغېز لرونکي رسنۍ جایزه تر لاسه کړه.
دغه جایزه د چهارشنبې (د لېندۍ ۱۹مه) په ورځ د ټایوان مرکز ټایپي کې اعلان شوه.
دغه جایزې په درېيو برخو کې له افغانستانه مېرمن راډيو ته د تأثیر لرونکي رسنۍ په توګه، یوې روسي خبریالي ایلینا میلاشینا ته د زړورتیا او د مصر یوې خبریالي لینا اتلا ته د بیان د ازادۍ په برخه کې ورکول شوې.
د مېرمن په نوم د دغې راډیو بنسټ شااوخوا ۹ کاله وړاندې د مریم دُرانۍ په نوم یوې ۳۵ کلنې ځوانې افغانې مېرمنې کېښود چې د مېرمنو له خوا په سیمه ییزه کچه ۱۴ ساعته د ښځو پر مسایلو خپرونې او پروګرامونه لري.
د مېرمنو لپاره په دغه ځانګړي محلي راډيو کې شااوخوا لس نجونې کار کوي چې د چهارشنبې په ورځ یې د بې پولي خبریالانو سازمان له خوا د ۲۰۲۰ میلادي کال د اغېزناکې رسنۍ په توګه جایزه تر لاسه کړه.
مریم دُرانۍ د دغه جایزې تر اعلان وروسته ازادي راډیو ته وویل چې ډېره خوشحاله ده چې دغه جایزه تر لاسه کوي: "طبعاً زه او زما همکاران د خوښۍ او خوشحالۍ احساس کوو چې زموږ یوې محلي راډيو په نړیواله کچه جایزه ترلاسه کړه."
مریم دُرانۍ تر دې مخکې ازادي راډیو ته د خپلو راډيويي پروګرامونو په اړه ویلي و چې د کندهار په سُنتي ټولنه کې په خاص ډول لېرو پرتو سیمو کې د ځنیو حساسیتونو سره مخامخېږي: "د ټولنې د ارزښتونو له خاطره موږ لا هم د ستونزو سره مخامخ یو، دا حساسیتونه په ښار کې نه، بلکې په ولسوالیو او کلیو کې شته."
مریم دُرانۍ د مېرمنو لپاره د ځانګړي راډيو ترڅنګ د 'خدیجه الکبرا' په نوم د یوه مدني بنسټ په چوکاټ کې د مېرمنو لپاره ورزشي کلب، کتابتون او د عصري زده کړو بېلابېل کورسونه لري.
هغه د خپلو دغه فعالیتونه له کبله څو ځله په نړيواله کچه ستایل شوې او ډېرې جایزې یې ترلاسه کړي دي.
د بې پولي خبریالانو سازمان له خوا د مریم دُرانۍ سیمه ییزې راډيو ته د ۲۰۲۰ میلادي کال د تاثیر لرونکي رسنۍ د جایزې تر څنګ په دوو نورو برخو کې یوې روسي خبریالي ته د زړورتیا او د مصر یوې خبریالي ته د بیان د ازادۍ جایزې اعلان شوې .